ҚР ҰҚК Шекара қызметінің Жетісу облысы бойынша департаментіне қарасты Алакөл ауданы шекара басқармасының бөлімшелері мен кәсіптік-техникалық дайындық бөлімінің жеке құрамы Халықаралық “Алаш” әдеби сыйлығының лауреаты, филология ғылымдарының кандидаты, Бауыржан Момышұлы атындағы “Намыс” төсбелгісінің иегері, белгілі ақын Бақытбек Бәмішпен кездесті.
Рухани тағылымға толы бұл жүздесудің басты мақсаты — шекарашылардың бойында ұлттық рухты, патриоттық сезімді және отансүйгіштік қасиетті күшейту болды. Кездесу барысында ақын өзінің шығармашылық жолынан сыр шертті, ел мен жер тағдырына арналған өлеңдерін оқып, әдебиет пен өмірлік тәжірибесі жайлы ойларымен бөлісті.
Сонымен қатар Бақытбек Бәміш батыр Бауыржан Момышұлының ерлікке толы өмірі мен тұлғалық келбетін ерекше атап өтіп, оның қаһармандық болмысы қазіргі жастарға үлгі болуға тиіс екенін айтты.
Кездесу аясында шекара қызметінің жеке құрамы ақынға түрлі сұрақтар қойып, рухани тәрбиенің, әдебиеттің және әскери қызметтің өзара байланысы жөнінде терең пайымдарды тыңдады. Шара соңында қатысушылар ақынға алғыстарын білдіріп, бұл кездесудің ұзақ уақыт жадыда сақталатынын жеткізді.
Тағылымы терең бұл шара — жеке құрамның рухани серпілісін арттырып, ел алдындағы адал қызметке тың серпін берген маңызды рухани оқиға болды.
«Жетісу-Ақпарат»
