Алаяқтық әрекеттер бірнеше деңгейден тұрған. Ұйымдастырушы арнайы жабдықталған кеңсе жалдап, онда компьютерлер, байланыс құралдары мен ондаған SIM-картамен жабдықталған заңсыз «call-орталық» құрған. Онда жұмыс істеген адамдар өздерін банк, мобильді операторлар мен мемлекеттік органдардың қызметкерлері ретінде таныстырып, тұрғындардың смартфондарына зиянды қосымшаларды орнатуға көндірген. Сол қосымшалар арқылы алаяқтар жәбірленушілердің смартфондарын қашықтан басқарып, онлайн несие рәсімдеген. Қылмыстық жүйеде «қолма-қол ақшаға айналдыру» тобы маңызды рөл атқарған.
Олар Telegram мессенджері арқылы ақша түсетін шот иелерінің деректерін сатып алып, олардың банк қосымшаларына қол жеткізген. Тергеу материалдарына сәйкес, күдікті жас жігіт дәл осы топтың құрамында болған. Мысалы, 2023 жылы алаяқтар жәбірленушілердің бірінің телефонына қол жеткізіп, оның атына 20 миллион теңгеден астам сомаға несие рәсімдеген. 2023 жылдың наурыз айынан 2024 жылдың маусымына дейін күдікті ұйымдасқан қылмыстық топ құрамында болып, көмекші рөлін атқарған. Оған алдын ала сөз байласу арқылы ақпараттық жүйелерді пайдаланып, аса ірі көлемде жасалған алаяқтық дерегі бойынша айып тағылып отыр. Жәбірленушілерге келтірілген шығын көлемі – 67 миллион теңге. Қазіргі таңда бұл іс сотқа жолданды. Алаяқтық схеманың өзге де қатысушыларына қатысты тергеу жалғасуда.
