Ұлттық қауіпсіздік комитетінің антикоррупциялық қызметі Қазақстанның көлік вице-министрі Сатжан Аблалиевті ұстау сәтінен бейнеүзік жариялады. Оған жол құрылысына жауапты компанияларға қамқорлық көрсеткені үшін 78 мың доллар пара алды деген айып тағылып отыр. Бұл қаражатты шенеунік ұлының Ұлыбританиядағы оқуына жұмсаған болуы мүмкін.
Бұл туралы 7-su.kz ақпараттық порталы smartnews.kz сайтына сілтеме жасап хабарлайды.
ҚР ҰҚК Көлік вице-министрі Сатжан Аблалиевтің ұсталған сәтінен бейнематериал таратты. Кадрларда оның құзырлы органдарға ештеңе күтпеген қалыпта, құлаққаппен келе жатқан кезінде көшеде ұсталғаны көрсетіледі. Кейінгі эпизодтарда — үстел үстінде, кілемде, тіпті гүл салғыш ішінде жатқан доллардың қомақты бума ақшалары бейнеленген. Жанында — алтын жалатылған элементтері бар чемодан.
Аблалиевке ірі көлемде пара алды деген күдік тағылып отыр. Тергеу деректеріне сүйенсек, ол 78 мың АҚШ долларын жол салу және бақылау жұмыстарын жүргізген компанияларға қамқорлық көрсету үшін алған. Ақша баласының Ұлыбританиядағы оқуына және тұруына жұмсалғаны айтылуда.
Сот оның қамауға алынуына санкция берген.
Сатжан Аблалиев — техника ғылымдарының кандидаты, «Құрмет» ордені және бірнеше мемлекеттік медальмен марапатталған. 2004 жылдан бері Көлік министрлігінде түрлі лауазым атқарған. Сондай-ақ, Солтүстік Қазақстан облысы әкімінің орынбасары болған. 2023 жылдың қазанында көлік вице-министрі қызметіне қайта тағайындалған.
Ол бастамашы болған жобалар қатарында 12 мың шақырым автожолды жаңарту, KazRAP жол сапасын бағалау ұлттық бағдарламасын енгізу, Түркиямен транзиттік тасымалды жеңілдету және шекара өткелдерін ауқымды жаңғырту бар.
Айта кетерлігі, оның ұсталғаны Көлік қызметкерлері күні қарсаңында орын алды.
