Шерзат Болат өлімі бойынша өтіп жатқан сот отырысында сотталушы Шыңғыс Белгожаев болған оқиға жайлы өз нұсқасын айтты, деп хабарлайды 7-su.kz ақпараттық порталы BAQ.KZ сайтына сілтеме жасап.
Сол күні кешке жұмыстан шығып, Тұрар Рысқұлов ауылына келіп, досым Азамат Тоқтаубаевқа жолықтым. Екеуіміз 1 сағаттай әңгімелестік. Содан кейін Азаматқа Нұрқияс қоңырау шалды. Ол «Эйфория» кафесінде отырғанын айтып, бір жерге жеткізіп тастауды сұрады. Сонымен Азамат Тоқтаубаев екеуіміз Талғарға қарай бардық. «Эйфория» кафесіне барғанымызда Нұрқияс, Равиль, Абзал және екі қыз отыр екен. Біз де сол жерде олармен бірге әңгімелесіп, отырып қалдық. Одан кейін Нұрбол Тоқтаубаев хабарласып, жағдай сұрасты. Сөйтіп кафеде отырғанымды айтқанымда ол келіп, жолығып кететінін айтты. Ол Думан екеуі келді. Аз ғана уақыт отырып, кетіп қалды, — дейді Шыңғыс.
Ол Нұрбол Менделеев көшесіндегі дүкенде бір жағдай болып қалғанын айтып, қайта хабарласып, «келе аласыңдар ма» деп шақырғанын жеткізді.
Біз кафе жабылып, кетейін деп, көлік қыздырып отырғанымызда Азамат Тоқтаубаев Абзалға хабарласып, бір жағдай болып қалғанын айтып, автобазаға шақырды. Сөйтіп бәріміз кафеден шығып, «Қамажай» дүкеніне барғанда шамамен 10 шақты адам тұрды. Араларында Нұрбол, Думан және жанында Дархан Әскентай болды. Дарханды бұрын-соңды Нұрболмен бірге 3-4 рет көргенмін. Бірақ жақын араласатындай танысым емес. Сол кезде Дарханның түріне қарағанымда, беті қан болды. Не жағдай болғанын сұрағанымда, жағдайды айтып, ұрып жіберді деді. Сөйтіп тұрғанымызда Қаржаубай дүкеннен пышақпен жүгіріп шығады. Осы сәтті көргеннен кейін тоқтай ма деген оймен мен де қалтамнан бәкімді шығарамын. Ол кісі тоқтамай, жүгіре бастағанда, мен есікті теуіп, ол кісіні қайтадан дүкеннің ішіне кіргізіп жіберемін. «Қойыңдар, қойыңдар, пышақты таста» дегенімізге қарамай, пышағын тастамайды. Ол кезде көрген пышақ істе тіркелген пышақ емес, үлкен ас пышағы болатын, — деді сотталушы.
Шыңғыс Белгожаев сол жерде төбелес басталып кеткенін есіне алды. Сөзінше, ол кімді кім бірінші ұрғанын байқамаған.
Сосын мылтықтың бірінші оғы атылады. Қарасам, сақалды мылтықты бізге қаратып, екінші оғын атайын деп тұр. «Қамажай» дүкенінің жанында ағаш бар, соған қарай қаштық. Сол кезде екінші оғын атады.
Сөйтіп екінші оғын атқаннан кейін артқа қарай жүре бастайды. Жігіттер алға қарай жүре бастайды. Сонымен оларға қарай жеткенде, мен де жүгіріп барып, тебем, ұрам. Мен негізі мылтық атқан сақалдыны ұрамын деп барғанмын, кейін видеодан қарасам Шерзатты ұрған екенмін. Бардым, ұрдым, тептім. Сосын «кеттік, кеттік» деген дауыс естілгенде, бәріміз көлікке отырып, оқиға болған жерден кетіп қалдық, — деп айтты Шыңғыс Белгожаев.
Ол сөзінде Шерзаттан басқа ешкімді ұрып-соқпағанын және ешкімге пышақ сұқпағанын айтты.
