Бұл туралы 7-su.kz ақпараттық порталы baq.kz сайтына сілтеме жасап хабарлайды.
Министрліктің мәлімдеуінше, қазіргі уақытта Ақпараттық қауіпсіздік комитеті құқық қорғау және арнайы органдармен бірлесіп, ұсынылған деректердің шынайылығы мен өзектілігін анықтау үшін кешенді тексеру жүргізіп жатыр.
Алғашқы талдау нәтижелері аталған деректердің мемлекеттік емес, яғни жекеменшік ақпараттық жүйелерден алынуы мүмкін екенін көрсеткен. ЦДИАӨМ мәліметінше, қазіргі таңда мемлекеттік ақпараттық жүйелерден дербес деректердің таралуы немесе хакерлік шабуыл арқылы бұзылу фактілері тіркелген жоқ.
Тексеру толық аяқталғанға дейін қандай да бір қорытынды жасау немесе ақпараттың шынайылығын растау ерте, – делінген министрліктің хабарламасында.
Сонымен қатар, егер азаматтың дербес деректері тараған мәліметтер арасында болған жағдайда, оған eGov электрондық үкімет порталы арқылы жеке кабинетінде хабарлама жолданады.
Министрлік мұндай жағдайлар бұған дейін де тіркелгенін еске салады. Сол кезде де жарияланған деректер ескі ақпараттық базалардан – негізінен қызмет көрсету салаларынан және микроқаржы ұйымдарынан алынған болатын.
Қазіргі таңда жағдай министрліктің бақылауында. Қосымша ақпараттар тексеру аяқталған соң жарияланады.
