Талғар ауданында «Ниссан» маркалы темір тұлпар қолды болды. Аталған ақпарат бойынша жедел жұмыс жүргізген полицейлер қылмысты бір сағат ішінде әшкереледі. Бұл туралы «Жетісу» газеті хабарлады.
Талғар ауданындағы Бесағаш ауылында орналасқан көлік сату орталықтарының біріне тиесілі көліктің ұрланғаны туралы полицияға арыз түскен. Қылмысқа қатысты адамдарды анықтау туралы тапсырма тәжірибелі мамандарға тапсырылды.
— Көлік сату орталығының аумағынан «Ниссан» маркалы жеңіл көліктің ұрланғаны анықталды. Осы қылмысты ашуға бағытталған кең ауқымды шаралар барысында барлық бейнекамералардың жазбаларын зерделеп, бір сағат ішінде қолды болған көлікті таптық. 1998 жылы туған күдікті қылмысын бірден мойындады. ҚР Қылмыстық кодексінің 188-бабына сәйкес сотқа дейінгі тергеу амалдары жалғасуда. Өзге ақпарат тергеу құпиялығына байланысты таратылмайды, — деді Талғар аудандық криминалдық полиция бөлімінің жедел уәкілі Исламжан Усманов.
Тергеу барысында күдікті көлік сату мекемесіне жақын жерде көп жыл иесіз тұрған көлікті сыртынан көріп жүргенін және оны ешкімге қажет емес екен деп ойлап, заң алдындағы жауапкершілікті ескерместен, өз үйіне тиеп кеткенін мойындады.
Қазіргі уақытта қолды болған көлік тәркіленіп, іс материалдарына айғақзат ретінде тіркелді. Заң талаптарын білмеу адамдарды жауапкершіліктен босатпайтыны анық. Ендеше, жергілікті тұрғын өзгенің мүлкін ұрлағаны үшін заң алдында жауап беретін болады.
«ЖЕТІСУ-АҚПАРАТ»
