Талдыкорғанда интернет-алаяқтықтың алдын алуға бағытталған акция өтті, — деп хабарлайды Polisia.kz.
Талдықорғанда Қаржылық қауіпсіздік күніне орай интернет-алаяқтықтың алдын алу акциясы өтті Талдықорған қаласының орталық жағажайында Қаржылық қауіпсіздік күні аясында Жетісу облысы Полиция департаментінің Киберқылмысқа қарсы іс-қимыл басқармасы мен «Қос Қанат Жетісу» қоғамдық бірлестігінің ұйымдастыруымен ақпараттық-түсіндіру акциясы өтті. Іс-шараның мақсаты — ақпараттық технологияларды пайдалана отырып жасалатын құқықбұзушылықтардың алдын алу.
Акцияның басты мақсаты – азаматтардың құқықтық және қаржылық сауаттылығын арттырып, цифрлық қауіпсіздік бойынша дағдыларын қалыптастыру болды. Шараға келген тұрғындарға интернет-алаяқтардың құрбаны болмаудың жолдарын түсіндіретін жадынамалар мен ақпараттық брошюралар таратылды.
Іс-шараның интерактив бөліміне ерекше көңіл бөлінді: ұйымдастырушылар киберқауіпсіздік пен қаржылық сауаттылыққа қатысты зияткерлік ойындар мен викториналар өткізді. Жеңімпаздарға және белсенді қатысушыларға естелік сыйлықтар табыс етілді.
Акцияға әлеуметтік желілерде Optimist.hafiz лақап атымен танымал блогер және қоғам белсендісі Хафиз Ғалымжанов қатысып, іс-шара материалдарын интернетте кеңінен бөлісті. Бұл өз кезегінде акцияның профилактикалық әсерін арттырды.
Ұйымдастырушылар цифрлық дәуірде Қаржылық қауіпсіздік күні – бұл жай ғана күн емес, әр азаматқа сергек әрі ақпараттандырылған болудың маңыздылығын еске салатын күн екенін атап өтті. Осындай іс-шаралар алдағы уақытта да тұрақты түрде өткізіліп тұрады, себебі киберқылмысқа қарсы күрес – бұл полиция мен қоғамның тығыз ынтымақтастығын талап ететін ортақ іс.
