Бүгін Талдықорған қаласында «Халықаралық нашақорлыққа қарсы күрес күніне» орай «Біз есірткіге қарсымыз!» атты кең көлемді облыстық акция ұйымдастырылады. Шара Жетісу облысы әкімдігінің қолдауымен, облыстық Полиция департаменті және Прокуратурасының бірлесуімен өтуде.
Сағат 11:00-де Дәнеш Рақышев атындағы Жетісу облыстық филармониясында «Есірткісіз әлем» атты бишілер байқауы және «Ән қанатында» әншілер сайысы өтеді.
Ал, кешкі 18:00-де Жастар саябағында тұрғындар назарына «Есірткіге жол жоқ» сурет көрмесі мен «Есірткісіз өмір – дені сау ұрпақ» атты кітап көрмесі ұсынылады. Сонымен қатар, тұрғындар арасында «Қол күрес», «Гир көтеру», «Арқан тарту» сияқты спорттық жарыстар ұйымдастырылады. Акция аясында «Біз есірткіге қарсымыз!» атты шеруге қатысушылар мен «Наркостоп» флешмобы ерекше көңіл-күй сыйламақ. Аспанға 1–1,5 метрлік «Нет наркотикам!» жазуы бар гелий шарлары ұшырылады.
Мерекелік шарада облыс әкімінің, облыстық Полиция департаменті басшысының және облыс прокурорының құттықтаулары мен марапаттау рәсімдері өткізіледі.
Қатысушылар назарына каратистердің көрсетілімдері, кинологиялық орталықтың қызметтік иттері мен арнайы жасақтың шеберлігі ұсынылады. Шара соңы өнер иелерінің мерекелік концертімен түйінделеді.
