А.Макаров атындағы №6 орта мектепте оқушыларға арналған есірткіге қарсы профилактикалық дәріс ұйымдастырылды. Іс-шара Жетісу облысындағы жасөспірімдер арасында есірткіге байланысты құқық бұзушылықтардың алдын алу және жазғы демалыс кезеңінде қауіпсіздік шараларын күшейту мақсатында өтті.
Дәрісті Талдықорған қалалық полиция басқармасының қызметкерлері облыстық психикалық денсаулық орталығының нарколог-дәрігерімен бірлесіп өткізді. Мамандар оқушыларға зиянды әдеттерден аулақ болу жолдарын, ішкі мотивацияны арттыру, күйзелісті еңсеру тәсілдерін және салауатты өмір салтының маңыздылығын түсіндірді.
— Жастармен алдын алу жұмысын неғұрлым ерте бастау өте маңызды. Біз тек ақпарат беріп қана қоймай, олардың есірткіге деген сыни көзқарасын қалыптастыруға тырысамыз, — деді кеңес өкілі.
Аталған дәріске 97 оқушы қатысты. Ұйымдастырушылардың айтуынша, мұндай кездесулер жасөспірімдердің денсаулық пен қауіпсіздікке жауапкершілікпен қарауына септігін тигізеді.
Айта кетейік, бүгінде еліміз бойынша есірткі құқық бұзушылықтарының алдын алуға бағытталған 75 өңірлік кеңес жұмыс істейді. Олар ақпараттық-түсіндіру жұмыстарын жүргізіп, жергілікті деңгейде жастарға қолдау көрсетеді.
