Талғар ауданында 16 жастағы Шерзат Полаттың өліміне қатысты атышулы іс бойынша үкім 2025 жылғы 5 маусым күні сағат 16:00-де жарияланады. Бұл туралы Жетісу облысының қылмыстық істер жөніндегі мамандандырылған ауданаралық сотында өткен отырыста судья Ержан Жанұзақов мәлімдеді.
— «Сот үкім шығару үшін кеңесу бөлмесіне кетеді. Үкім 5 маусымда сағат 16:00-де оқылады», — деді судья.
Не болды?
Еске салайық, Талғардағы қақтығыс салдарынан 16 жастағы Шерзат Полат қаза тапқан болатын. Қылмыстық іс бойынша бірнеше адам жауапқа тартылып отыр. Сот процесі барысында барлық айыпталушылар істеген ісіне өкінетіндерін жеткізді.
Бұған дейін мемлекеттік айыптаушы Дана Сәрсенбай жарыссөз кезеңінде айыпталушыларға қатаң жаза тағайындауды сұраған болатын.
Айыптаушы тараптың талаптары:
-
Абзал Шынасыл – ҚР ҚК 99-бабы (Адам өлтіру) және 293-бабы (Бұзақылық) бойынша кінәлі деп танылып, 23 жылға бас бостандығынан айырылуы сұралды.
-
Думан Ысқақ – ҚК 434-бабы (Қылмыс туралы хабарламау) бойынша 1 жыл 6 айға сотталуы тиіс.
-
Дархан Әскентай, Нұрбол Тоқтаубаев, Дархан Қалихамет, Шыңғыс Белғожаев – ҚК 293-баптың 2-бөлігі (Бұзақылық) бойынша әрқайсысы 7 жылға бас бостандығынан айырылуы сұралды.
-
Нұрқияс Ілиясов – 7 жылға соттау ұсынылды, ал бұрын өтелмеген жаза мерзімін ескере отырып, жалпы 9 жыл.
-
Азамат Тоқтаубаев – ҚК 290-бабының 3-бөлігі (Қаруды заңсыз сақтау, тасымалдау немесе алып жүру) бойынша 7 жыл, ал бұрынғы жазалармен қосқанда 15 жыл бас бостандығынан айыру сұралды.
-
Равиль Сәкиев – ҚК 293-баптың 3-бөлігі бойынша 15 жыл, ал бұрынғы өтелмеген жазамен қоса есептегенде жалпы 20 жылға соттау сұралды.
Сот үкімі алдағы күндері белгілі болады. Бұл іс қоғамда үлкен резонанс тудырып, әлеуметтік желілерде де кеңінен талқыланып жатыр.
«Жетісу-Ақпарат»
