Жетісу облысы құрылғаннан берігі үш жылда Полиция департаментіне жергілікті бюджеттен тұрақты түрде қаражат бөлініп, заманауи техникамен және арнайы құрылғылармен жабдықталуда. Соның арқасында 2022 жылдан бері қылмыстық құқық бұзушылық саны екі есе азайды.
Бүгінге дейін құқық бұзушылықты жедел анықтау мақсатында қашықтықтан басқарылатын 29 ұшу аппараты сатып алынып, аудандық, қалалық полиция бөлімдеріне және департамент басқармаларына берілді. Сол сияқты 177 бірлік қызметтік және арнайы автокөліктер, заман талабына сай әртүрлі үлгідегі қару-жарақтар алынды. Өңірде 1110 бейнекамера орнатылған, оның 800-інде құқық бұзушылықтарды өз бетінше анықтап, тиісті орынға жібере алатын интеллектуалды функциялары бар.
— Қоғамдық орындарда құқық бұзушылықтың алдын алу мақсатында 5 ауданда 8 модульдік бекеттер іске қосылды, 6 ғимаратқа жөндеу жасалды. Қазіргі таңда Қаратал аудандық полиция бөлімінде кіші жедел басқару орталығын ашу жұмыстары аяқталып, іске қосуға әзірленуде. Өткен жылы Жылдам қимылдайтын арнайы жасақ үшін Панфилов ауданы Головацкий ауылында орналасқан ғимарат толық күрделі жөндеуден өткізіліп, Полиция департаментінің балансына берілді. Жедел басқару орталықтары, бейнебақылау жүйелері, цифрлық технологиялар тәртіп сақшыларының тиімді әрі жедел жұмыс істеуіне үлкен мүмкіндік беруде. Алдағы уақытта бұл бағыттағы жұмыстар жүйелі түрде жалғасады, — деген еді облыс әкімі Бейбіт Исабаев Полиция күніне арналған салтанатты жиында сөйлеген сөзінде.
Осындай қолдаулар мен қабылданған шаралардың арқасында
2022 жылдан бері қылмыстық құқық бұзушылық саны екі есе азайған. Соның ішінде қарақшылық, тонау, ұрлық пен бұзақылық деңгейі 2 есе төмендеді, ал кісі өлтіруге қатысты қылмыстар 20 пайызға кеміді. Қоғамдық орындардағы қылмыс саны 30 пайызға азайды.
Жетісу облысы әкімінің баспасөз қызметі.
