Жетісу облысы, 2025 жылғы маусым — Жетісу облысында полиция, экономикалық тергеу және кеден қызметінің бірлескен операциясы нәтижесінде 60 тоннадан астам қорғасын тиелген екі жүк көлігі шекарадан заңсыз шығарылмақ болған жерінен тоқтатылды. Бұл туралы ҚР Ішкі істер министрлігі Ұйымдасқан қылмысқа қарсы күрес департаментінің өкілі Қуандық Алпыс хабарлады.
Тәркіленген жүктің нарықтық құны 60 миллион теңгеден асады. Қазіргі таңда аталған заңсыз әрекетті ұйымдастырған тұлғаларды анықтау және ұстау бойынша жедел-іздестіру шаралары жүргізілуде.
Ұқсас заңсыз әрекеттер басқа өңірлерде де анықталды
-
Солтүстік Қазақстан облысында — «жоғары легирленген болат» ретінде 1 мың тонна қара металл сынығын шетелге жөнелтуге тырысқан кәсіпорынның әрекеті әшкереленді. Оның ішінде 7 вагон жүк дайын тұрған.
-
Маңғыстау облысында — Каспий маңы елдерінің біріне теңіз арқылы 400 тоннадан астам қара металл сынығын заңсыз экспорттауға бағытталған схема анықталды. Екі контейнер толығымен дайындалған күйінде табылды.
ІІМ түсіндірмесі
ІІМ өкілінің айтуынша, бұл шаралар стратегиялық маңызды шикізат ресурстарының шетелге заңсыз кетуінің алдын алу, елдің экономикалық қауіпсіздігін сақтау және ұлттық мүддеге зиян келтірмеу мақсатында қабылданып отыр.
Барлық анықталған фактілер бойынша кінәлі тұлғалар қолданыстағы заңнамаға сәйкес жауапкершілікке тартылды. ІІМ бұл бағыттағы жұмыстарды жалғастыра беретінін мәлімдеді.
«Жетісу-Ақпарат»
