Қазақстан Республикасы Бәсекелестікті қорғау және дамыту агенттігінің Жетісу облысы бойынша департаменті «Жетісу» әлеуметтік-кәсіпкерлік корпорациясы» акционерлік қоғамының қызметінде бәсекелестік заңнамасының талаптарына сәйкес келмейтін әрекеттерді анықтады.
Тексеру барысында аталған кәсіпорынның белгілі бір жеткізушілерден тауарларды басымдықпен сатып алғаны және әлеуметтік маңызы бар өнімдерге кейбір өнім берушілерге негізсіз жеңілдіктер ұсынғаны белгілі болды. Бұл жағдай нарық қатысушылары үшін тең емес жағдайлар туғызған.
Аталған құқық бұзушылықтардың негізінде департамент тарапынан «Жетісу» ӘКК» АҚ-ға ресми хабарлама жолданып, соның нәтижесінде шарттарға түзетулер енгізіліп, артықшылықтар жойылды.
Айта кету керек, «Жетісу» ӘКК» АҚ өңірдегі әлеуметтік маңызы бар азық-түлік тауарларының бағасын тұрақтандыру мақсатында арнайы функцияларды атқарады.
