Жетісу облысында полицейлер заңсыз айналымға жіберілмек болған ірі көлемдегі синтетикалық есірткіні тәркіледі, – деп хабарлайды 7-su.kz ақпараттық порталы.
Жетісу облысы Полиция департаментінің Есірткі қылмысына қарсы іс-қимыл басқармасының қызметкерлері жүргізген арнайы жедел-іздестіру іс-шаралары нәтижесінде аймақтағы қауіпті заңсыз әрекет дер кезінде тоқтатылды. Тәртіп сақшыларының қырағылығы арқасында жүздеген адамның өмірін улауы мүмкін есірткі партиясы сатылымға шықпай қалды.
Арнайы операция барысында синтетикалық есірткіні заңсыз сақтап, өткізді деген күдікпен 41 жастағы жергілікті тұрғын қолға түсті. Тәртіп сақшылары жүргізген жеке тінту мен санкцияланған тергеу әрекеттері кезінде күдіктінің жанынан психотроптық зат – мефедрон салынған бірнеше орама табылды.
Сараптама қорытындысы тәркіленген мефедронның жалпы салмағы 270 грамнан асатынын көрсетті. Тәртіп сақшылары ұсынған дерекке сүйенсек, бұл салмақ заңнама бойынша аса ірі мөлшерге жатады.
«Жедел әрекеттердің нәтижесінде синтетикалық есірткінің заңсыз айналымға түсуіне толықтай жол берілмеді. Бұл – өңір тұрғындарының, әсіресе жастардың денсаулығы мен өмірін қауіптен аман алып қалуға бағытталған маңызды қадам», – деп атап өтті құқық қорғау органдарының өкілдері.
Қазіргі уақытта аталған дерек бойынша сотқа дейінгі тергеп-тексеру жұмыстары жүріп жатыр. Күдікті азамат уақытша ұстау оқшаулағышына қамауға алынды. Құқық қорғау өкілдері қылмыстың барлық мән-жайын анықтаумен қатар, тыйым салынған заттың өңірге жеткізілу және таратылу арналарын толықтай әшкерелеу бағытында жедел-тергеу шараларын жалғастыруда.
Жетісу облысы Полиция департаменті есірткі құралдарының заңсыз айналымы қоғамдық қауіпсіздікке үлкен қатер төндіретінін ескертеді. Сондықтан мұндай қылмыстардың алдын алу, жолын кесу бағытындағы кешенді жұмыстар тұрақты бақылауда ұсталады.
