Жемқорлық – індет, жою – міндет. Бүгінде өзекті мәселенің бірі – сыбайлас жемқорлық. Бұл індетті жою үшін өңірімізде түрлі шаралар өткізілуде.
Бүгінде «Мемлекеттің қаржысын жымқырыпты», «Жемқорлықпен ұсталыпты» деген желдей ескен жаңалыққа етіміз үйреніп кеткендей. Селт етпейміз.Антикор қызметкерлері жемқорлықты тыю үшін түрлі шара ұйымдастыруда. Біз де қаржы жымқырғандарды аймаңдай қылып газетке де, сайтқа да жазып беріп жүрміз. Бірақ, Құдайдан қорықпаған адам – пендеден ұяла қойсын ба?! Заң қаталданып, бақылау күшейтілсе де жең ұшынан жалғасқан жемқорлық азаяр емес.
Еліміздің қауіпсіздігі жемқорлықпен тікелей байланысты. Сондықтан да онымен күресті тек заң қызметкерлері ғана жүзеге асырады деп бойымызды аулақ салмай, бірлесе күресу баршамыз үшін маңызды іс. Облыста сыбайлас жемқорлық тәуекелдері картасын іске асыру шаралары сәтті жүзеге асырылуда. Сыбайлас жемқорлыққа қарсы іс-қимыл агенттігінің облыстық департаменті басшысының міндетін атқарушы Саян Ахметжанов сыбайлас жемқорлық тәуекелдері картасы бойынша атқарылып жатқан жұмыстарды баяндап, алдағы күндерге жетелеген шаралар туралы толыққанды мәлімет берді.
Сыбайлас жемқорлық тәуекелдерінің алдын алу үшін картада құрылыс және тұрғын үй, экология, фискалдық, кәсіпкерлік, әлеуметтік сала, жол және инфрақұрылым, проблемалық құрылыс нысандары, апаттық және тозығы жеткен үйлер, агроөнеркәсіптік кешен сияқты 9 негізгі сала анықталыпты.
– Жемқорлық жойылмай, ешбір ел табысты дами алмайды. Сол себепті жемқорлықпен күрес күшейтіліп, әр сала бойынша жүйелі жұмыс жүргізіліп, заң бұзғандар жауапқа тартылуда. Атап айтсақ, мемлекеттік сатып алу бойынша 363 млн. теңгені тиімсіз жұмсаудың 13 фактісі анықталды. Биыл 6 адам әкімшілік жауапкершілікке тартылды. Нәтижесінде 1 107 600 теңге сомасына айыппұл өндіріліп, барлық сома толық көлемде өтелді. Жол саласы бойынша сертификатталмаған және сапасыз материалдарды қолдану тәуекелдері жойылды. Ішкі мемлекеттік аудит департаменті жергілікті атқарушы органның 2,6 млрд. теңгеге өткізілуі тиіс мемлекеттік сатып алудың күшін жойды, – деді Саян Қылышұлы.
Сонымен қатар, спикер Талдықорғандағы коттедж қалашығында 2-ші және 3-ші кезеңдік коттедждің құрылысы, қаланың суару желілерін қайта жаңарту, Алакөл көлінің қоршау бөгетін салу жұмыстарына күнделікті мониторинг жүргізу, департамент бақылауында тұрғанын айтып, алдағы жоспарымен бөлісті.
Бұдан бөлек, аймақта «Сыбайлас жемқорлыққа қарсы волонтерлік» жобасы іске қосылды. Мақсаты – жемқорлықтың алдын алу, оны болдырмау, халыққа тегін заңгерлік көмек көрсету. Осы жоба аясында тәжірибелі заңгерлер және құқық қорғау органдарының қызметкерлері облыстың әр аудан қаласын аралап, «Халық заңгері» акциясын өткізуде. Мәселен күні кеше көшпелі мобильді топ Кербұлақ ауданына барып, тұрғындарға тегін заңгерлік көмек көрсетті.Сыбайлас жемқорлыққа қарсы іс-қимыл агенттігінің Жетісу облыстық департаментінің ұйымдастыруымен өткен жобаның мақсаты – шалғайдағы елді мекен тұрғындарының құқықтық сауаттылығын арттыру.
Сарыөзектегі Халыққа қызмет көрсету орталығында өткен шараға құқық қорғау органдарының қызметкерлері, сот орындаушылары, адвокаттар, қоғамдық ұйым өкілдері мен белсенді еріктілер қатысты. Білікті заңгерлерден кеңес алуға 60-тан астам тұрғын келді. Оның 22-сі мәселесін шешіп қайтты. Келгендердің басым көпшілігі мамандарға жер, тұрғын үй, субсидия алу, жұмыстан заңсыз шығару, кәсіпкерлікті тіркеу сынды мәселемен жүгінді. Сыбайлас жемқорлыққа қарсы іс-қимыл агенттігінің облыстық департаментінің бастығы Саян Ахметжанов бір сағаттың ішінде 20 адамды қабылдап үлгерді. Ол әр тұрғынның өтінішін жіті қадағалап, тұшымды кеңес берді.
Сыбайлас жемқорлықтың алдын алу үшін жүйелі жұмыс жүргізілуде. Соның нәтижесінде қаржы жымқырғандар құрықталуда. «Көп асқанға – бір тосқан» болатынын ақылы дария ата-бабаңыз әлдеқашан айтып кеткен. Сондықтан қандай қылмыс жасасаң да әшкере болатынын ұмытпайық. Өйткені тегін ірімшік қақпанда ғана болады.Сыбайлас жемқорлықтың алдын алу – барша қазақстандықтардың міндеті болуы керек. Олай болса әрбір азамат қоғамның жанашыры болып, жемқорлыққа қарсы күрес жүргізуіміз қажет.
Айдар ҚАЛИЕВ
