Құтқару жұмыстары кезінде азаматтық қорғау майоры Дамир ТАРАНОВ ерлікпен қаза тапты. бейбіт күннің батырына Мемлекет басшысының Жарлығымен «Ерлігі үшін» медалі берілді. Облыс әкімі Бейбіт ИСАБАЕВ медальді марқұмның туыстарына арнайы табыстады.
Дамир Таранов 2016 жылдан бастап өртке қарсы қызмет органдарында еңбек етіп, тәжірибелі маман ретінде танылып, Панфилов ауданының өрт сөндіру бөлімдерінде жауапты қызмет атқарды. Осы жылдың наурыз айында Алтынкөл көлінде мұз жарылып, бір адамды ағыс алып кеткені туралы хабар түскен. Құтқару жұмыстары барысында мұз қайта жарылып, №11 өрт сөндіру бөлімінің қарауыл бастығы өз өмірін қатерге тікті. Марқұмның артында зайыбы мен екі баласы қалды.
Өңір басшысы ел қауіпсіздігін қамтамасыз етуде азаматтық қорғау органдары қызметкерлерінің қосқан үлесінің зор екенін атап өтті.
– Құтқарушылардың жұмысы күрделі, әрі түрлі қатерге толы. Олар халықтың қауіпсіздігі үшін күн-түн демей тынымсыз қызмет етеді. Солардың қатарында қызметтік міндетін атқару кезінде ерлікпен қаза тапқан азаматтық қорғау майоры Дамир Таиржан-ұлының есімін ерекше құрметпен атаймыз. Оның ерлігін ескеріп, қаза болғаннан кейін Мемлекет басшысы «Ерлігі үшін» медалімен наградтады. Дамир бауырымыз өзінің өнегелі өмірімен бір әулеттің ғана емес, бүкіл халықтың ұлына айналды. Батырдың жарқын бейнесі әріптестерінің, жерлестерінің жүрегінде сақталады. Ал оның ерлігі кейінгі ұрпақ үшін нағыз патриоттықтың үлгісі болатыны анық, – деген облыс басшысы құтқарушының анасы Гүлсара Тарановаға медальді табыс етті.
– Жолдасым Дамирдің ерлігін бағалап, мемлекеттік деңгейде Президенттің атынан медаль берілді. Әттең, Дамир тірі болғанда бұл марапатты өзі алар еді. Амал қанша?! Оны алу бізге бұйырыпты. Ол нағыз еңбекқор, өз ісіне жауапты, патриот ер болатын. Өзгенің өмірін құтқару үшін өзінің жанын құрбан етті. Отанына, қызметіне деген адалдығын барынша көрсетіп кетті. Бұл – нағыз ерлік. Азаматымның жанкештілігін, адалдығын бағалаған Мемлекет басшысына аналық ақ жүрегіммен алғыс айтамын, – деді Дамир Таиржанұлының жары Румилям Тохтабакиева.
Еңлік кенеБАЙ
