Қаратал ауданы Көпбірлік ауылында өрт сөндіру бекеті пайдалануға берілді. «Ауыл құтқарушылары» ведомстволық бағдарлама аясында іске қосылған нысанның салтанатты шарасына облыстық төтенше жағдайлар департаменті басшысының орынбасары Адамбек Оразалинов, аудан әкімінің орынбасары Мақсат Чамиренов және ауыл тұрғындары қатысты.
Бекет жаңадан салынған жоқ. Жергілікті атқарушы орган бұрыннан бар ғимаратты қайта жаңғыртты. Негізінен өрт сөндіру бекеті 1740 тұрғыны бар Көпбірлік, Қарақұм және Ақжар ауылдарының өрт қауіпсіздігін қамтамасыз етеді.
Салтанатты шарада сөз сөйлеген аудан әкімінің орынбасары ел Президенті тапсырмасына сай әрбір қазақстандықтың қолайлы һәм қауіпсіз ортада өмір сүруіне жағдай жасалып жатқанын алға тартты.
– Тілсіз жау айтып келмейтінін ескерсек, аудан орталығынан шалғай орналасқан елді мекендер үшін мұндай бекеттердің маңызы зор. Жаңа нысанның іске қосылуы өртке жедел әрекет ету уақытын қысқартып, тұрғындар мен шаруашылық нысандарының қауіпсіздігін арттыруға мүмкіндік береді. Сонымен қатар, бұл бастама ауылдық жерлердегі азаматтық қорғаныс жүйесін нығайтып, төтенше жағдайлардың салдарын азайтуға оң әсерін тигізеді, – деді Мақсат Чамиренов.
Жаңғырту нәтижесінде нысан кезекшілікті ұйымдастыруға және туындайтын төтенше жағдайларға жедел әрекет етуге қажетті барлық құралмен жабдықталды. Мұнда жеке құрамның жұмысына, сондай-ақ, өрт сөндіру техникасы мен жабдықтарын орналастыруға қолайлы жағдай жасалған. Төтенше жағдайлар департаменті өрт сөндіру автоцистернасын, өрт-техникалық жарақтарды, жауынгерлік киім жиынтықтарын және байланыс құралдарын берді. Қызметкерлер өрттер мен басқа да төтенше жағдайларға әрекет ету бойынша тиісті дайындықтан өткен.
Келелі жиында облыстық төтенше жағдайлар департаменті мен әкімдік тарапынан үздік қызметкерлер мен жобаға қатысушылар марапатталды.
Айта кететін жайт, өңірде «Ауыл құтқарушылары» бағдарламасы аясында өрт сөндіру бекеттерін дамыту және азаматтық қорғау жүйесін нығайту жұмыстары әлі де жүзеге аса бермек.
Дастанбек САДЫҚ
