Әмина айнаға қарап анасының жанында шашын тарап отыр еді.
– Қызым, тарағыңды бере тұршы, – деді Айман.
– Жарайды, мама, – деді ол тарақты ұсынып. Анасының қолы қалтырап кетті. Әмина таңданып, ауызын ашып қалды.
– Мама, сенің қолдарың неге дірілдейді? – деп сұрады Әмина.
– Сендер көшеде ойнаған кезде қатты уайымдап отырам. Сен кішкентай кезінде белсебедтен құлап, қолыңды қатты жарақаттап алғансың. Бір апта ауруханада жаттың. Содан бері қолым қалтырайтын болды.
Әминаның анасына жаны ашып кетті.
– Мама, шашыңды мен тарап берейінші, – деп анасының қара шашын түзетіп, әдемілеп тарай бастады.
– Ой, мама, шашыңда ақ шаш бар екен, – деді қызы бір тал ұзын шашты ұстап. Анасы жымиып күлді.
– Мама, бұрын басыңда ақ шаш жоқ еді ғой, қалай пайда болған?
– Уайымдағаннан шығар, – деді Айман. – Адам уайымдай берсе жүрегі ауыра береді.
– Сонда ақ шаш уайымдағаннан шықты ма?
– Иә, өткенде інің қораның төбесіне шығып, түсе алмай бақырғанын білесің ғой. Мен Әли құлап қалды ма деп далаға атып шықтым. Әли екі қолымен ағаштан ұстап салбырап, жылап тұр екен. Әкең ініңді көріп, жүгіріп барып сатыны алды да, жерге түсіріп алды. Содан жүрегім ауырып кетті.
– Әли, бері келші! – деп Әмина інісін дауыстап шақырды. Ол жүгіріп жетіп келді.
– Не болды? Мені неге шақырдың? – деді Әли.
– Қарашы, маманың басына ақ шаш түсіпті.
– Ақ шаш дейсің бе? Қане, көрейінші!
– Міне, ұзын ақ шаш!
Әлидің ауызы ашылып қалды.
– Мама, маңдайыңды сырып алғансың ба? Менікі сияқты сызық бар ғой, – деді Әли.
– Сенікін тал сырып кеткен ғой. Менің маңдайыма әжім түскен.
– Әжім дейсің бе? Ол неге түседі? – деді Әли өз маңдайын сипап.
– Жүрегім ауырғаннан.
– Маманың жүрегі ауырса басына ақ шаш түседі, қолы қалтырайды, – деді Әмина інісіне жауап беріп.
– А, солай ма? – деп Әли ойланып қалды.
– Иә, – деді анасы. – Адамның жүрегі ауыра берсе, бетіне әжім түсіп, шашы ағарып, тез қартайып кетеді.
– Ой, мама, бізді кешірші, енді сенің жүрегіңді ешқашан ауыртпаймыз, – деді екеуі жарыса.
– Ақылдарыңнан айналдым! – деген Айман балаларының бетінен сүйіп, басынан сипады.
Асхат ӨМІРБАЕВ
Қаратал ауданы
