Балқаш ауданында 84 орынды бөбекжай пайдалануға берілді. Бұл туралы «Жетісу» газеті хабарлады.
Білім күні қарсаңында Бақбақты ауылында 84 орынды бөбекжай салтанатты түрде ашылды. Бұрын тәуелсіздік алған жылдары қараусыз қалған нысан өткен жылы ауыл тұрғындарының өтінішіне сәйкес бөбекжай болып ашылуға шешім қабылданған болатын. Бөбекжайды қайта қалпына келтіру үшін мемлекет тарапынан 367.2 млн.теңге бөлінді. Бөлінген қаржыны мақсатты жұмсап, күрделі жөндеу жұмысын сапалы жүргізген “Golden siti“ ЖШС нысанды мерзімінде аяқтаған. Бөбекжай іші толықтай заманауи материалдық базамен қамтылған.
Бөбекжай салтанатына қатысқан Балқаш ауданы әкімінің орынбасары Бөріхан Әбдібаев жиналған көпшілікті жаңа нысанның ашылуымен құттықтап, өңірдегі мектепке дейінгі тәрбие саласында атқарылып жатқан жұмыстарға тоқталды.
— Балаларды мектепке дейінгі тәрбиемен қамту мақсатында аудан бойынша 8 балабақша және 14 шағын орталық жұмыс жасап, балабақшаларда 935, шағын орталықта 600, барлығы 1535 бүлдіршін тәрбиеленуде. 3-6 жас аралығындағы бүлдіршіндерді қамту 99,3 пайыз болды. Облыс бойынша бұл көрсеткіш 95,6 пайыз екенін ескерсек, бұл бағытта ауданымызда ілгерілеу бар, — дей келе, жиналған қауымды алдағы келе жатқан жаңа Білім күнімен де құттықтап өтті.
Бөбекжайдың ашылуына аудандық білім бөлімінің басшысы Айман Аймұханбет, аудандық ішкі саясат бөлімінің басшысы Гауһар Аманжолова, Бақбақты ауылының әкімі Айдархан Түймебаев, ауыл ардагерлері, тұрғындары, мектеп ұстаздары мен бөбекжай ұжымы қатысты.
«Бақбақты ауылында бөбекжайдың ашылуы мектепке дейінгі білім мен тәрбие көрсеткішін біршама көтеретін болады», — деп атап өтті Балқаш аудандық білім бөлімінің басшысы А.Аймұханбет.
«Ауыл тұрғындарының өтінішін ескеріп, осы ғимаратты мемлекет қарамағына алып, оны қайтадан қалпына келтіру үшін қомақты қаржы бөлуге ықпал жасаған аудан әкімі Ғалым Тоқпейісовке, аудандық білім бөлімінің басшысы А.Аймұханбетке, осы саладағы барша жауапты мамандарға айтар алғысымыз шексіз», — деді «Күншуақ» бөбекжайының әдіскері Жазира Қазыбекова.
Ел тілегімен ашылған бөбекжайдан болашақта ұлтын сүйген қоғам қайраткерлері шығарына сенім мол.
«ЖЕТІСУ-АҚПАРАТ»
