«Нұр Отан» партиясы облыстық филиалында «Көш көлікті болсын!» республикалық акциясы өтті. Акция Дүниежүзі қазақтарының қауымдастығы, Қазақстан Республикасының Еңбек және халықты әлеуметтік қорғау, Ішкі істер, Сыртқы істер, Әділет министрліктері, жергілікті атқарушы органдар өкілдерінің және мемлекеттік емес ұйым жетекшілерінің қатысуымен партияның республикалық және аймақтық филиалдарының қоғамдық қабылдау бөлмелерінде де көрініс тапты.
Қоғамдық қабылдау бөлмесіне тәуелсіздік жылдары елімізге көшіп келіп, түрлі себептермен 2016 жылдың 1 қаңтарына дейін Қазақстан Республикасының азаматтығын ала алмай жүрген оралмандар мен этникалық қазақтар хабарласып, тіркеуге алынды.
Акцияға қатысушылар құзырлы мекеме басшыларына өздерін толғандырып жүрген сауалдарын қойып, жеке мәселелері бойынша көп мәлімет алды.
– Акцияның негізгі мақсаты – оралмандарға, этникалық қазақтарға және олардың отбасы мүшелеріне ұсынылатын мемлекеттік қолдау шараларын күшейту, әсіресе, аудандар мен қалаларда атқарушы билік тарапынан орындалған шаруаларға бақылау жасауымыз қажет. Көші-қон заңнамасының кемелденуіне байланысты елге оралатындар қатары жыл санап арта түсуде, – дейді «Нұр Отан» партиясы облыстық филиалы қоғамдық қабылдау бөлмесінің меңгерушісі Аманжол Жазықбаев. Облыстық ІІД Көші-қон қызметі басқармасының басшысы Ержан Алтаев аталмыш акцияның жыл сайын өтетінін айтып, қазіргі күнде өңірде шетелден келген 11 мыңға жуық қандастарымыздың азаматтық ала алмай жүргендігін жеткізді. Себебі, оралман куәлігінің мерзімі өтіп кеткен.
– Өзбекстаннан көшіп келген едік. Куәлігімнің уақыты өтіп кетіп, ешқандай мекемеге құжатсыз бас сұға алмай жүргеніме біраз болды. Басылым беттерінен осындай акция болатынын естіп, қоғамдық қабылдауға келдім. Партиялықтар менің жазбаша өтінішімнің негізінде миграция басшылығымен бірлесіп, елшіліктен құжатымды қайта жасауға көмек беретінін айтты. Алғысым шексіз сіздерге, – дейді Қапшағай қаласы, Кербұлақ ауылының тұрғыны Жанат Ибадулаева.
Акция барысында «Нұр Отан» партиясы облыстық филиалына 9 адам көмекке жүгініп, қажетті ұсыныс-кеңестер алып, құжаттарын рәсімдеуге мүмкіндік алды.
Мәулен Әнербай
