Мектеп оқушыларын медициналық тексерістен өткізу – жылдағы жоспарлы шаралардың бірі. Бала денсаулығын жіті бақылауда ұстау арқылы ауыр дерттердің белең алуына жол берілмейді. Алайда…
Әр мезгілдік демалыстан соң мектеп оқушылары педикулезге тексерістен өтеді. Тексеріс кезінде медбикелер тарапынан олқылықтар кетіп жататыны жасырын емес. Бұл тұрғыда кәсіби біліктілігіне араласудан аулақпыз. Есіңізде ме? Сыныптың есігі ашылып, мектеп медбикесі кіріп, жаппай қыздардың шашын тексеруге көшетін. Онымен қоймай, барлық сыныптың көзінше баланың басынан тапқан биттерді жариялай салатын. Бұл қағида мектептерде әлі сақталып келеді. Тек жарияламай құпия түрде ата-анасына жеткіземіз деп сендіреді. Сенгің-ақ келеді, бірақ. Өткенде Петропавл қаласында өрімдей қыз өз-өзіне қол жұмсады. Мәселені тексеру барысында қыз суицид жасамас бұрын сол күні педикулезге қарсы мектепте тексеріс болғаны анықталды. Ауруға шалдыққан қыздың жайын бүкіл мектеп естімесі бар ма? Әлгі медбикенің құпия сақтауы қайда сонда? Содан кеп замандастары тарапынан мысқыл күлкіні, мазақты көтере алмаған қыз әлгіндей сұмдыққа бой алдырады. Оған кім кінәлі?! Бұл бір ғана мысал.
Кейде ата-аналар мен оқушылар мектеп психологына жүгінуге еш асықпайды, оларға сенімі де жоғары емес. Қағазбастылықтан қолы босамайтын оларға кінә тағуға болмас, әрине. Себебі, қаламыздың бір мектебінде орташа есеппен 1800 оқушы оқыса, онда 2 психолог қана қызмет атқарады: бірі – қазақ сыныптарына, екіншісі – орыс. Яғни, мың балаға бір психолог. Бұл тым аз. Расында, бала өміріне бей-жай қарауға болмайды. Балаларға жеке тұлға ретінде назар аударып, болашағына селқостық танытпауымыз керек. Мәселен, әлгіндей тексерістерде әр оқушыны жеке қабылдау өте тиімді. Мектептегі медициналық қызметті бір жағына оңтайландыру қажет. Мүмкін балаларға медициналық қызмет көрсету тәртібінің жаңа моделін әзірлеу керек пе?! Дегенмен, нысанаға алынған бұл мәселе барысында мектеп медбикелеріне қойылатын талаптарға өзгерістер еніп, оқушыға көрсетілетін медициналық қызмет аясында тиімді тәсіл ойлап табыла ма, жоқ, сол қалпында қала ма, әзірге белгісіз.
Гүлдана КАТТЕБАЕВА, қала тұрғыны:
– Мектепте сыныптастарымның көзінше шашымды бөтен әйел тексере бастағанда қатты ұялып, жағымсыз күй кешемін. Басынан бит табылған балалар апталап, тіптен, айлап мектепке келуді доғаратын. Басқа мектепке ауысып кеткендер де болды.
Арман ИДРИСОВА, ата-ана:
– Қызымның аздап артық салмағы бар. Мектепте cалмағын өлшеу кезінде балалар қолымен шұқып, кемсітіп күлген. Жігері құм боп жасып қалған балам біраз уақыттай күйзелісте жүрді. Өзіне деген сенімсіздік пайда болды. Мектеп психологынан көмек болмады. Медбикелер дене салмағының жоғарылағанын анықтаған бетте өзімізге ескертіп, диетологтарға нұсқаулық көрсетсе екен деймін. Біздерге үлкен көмек болар еді.
Маржан ЖҰМАБАЕВА, психолог:
– Төменгі сынып оқушылары айналасындағы болып жатқан оқиғаларды, өзіне қатысты пікірді қабылдай бермейді. Көңіліне де тимеуі мүмкін. Ең қауіптісі жеткіншектік шақ, яғни, 11-12 жастан 14-15 жас аралығындағы «өтпелі» кезең. Бұл уақытта олар ең қызба жаста. Кейбірінің бойынан агрессивті мінез-құлықты байқауға болады. Жеке тұлғалық құбылмалылық өтпелі кезеңінде қиялшыл көңіл-күйімен ерекшеленеді. Сондықтан, құрбы-құрдастарының тарапынан моральдық қысым көрген жасөспірімдер тез күйзеліске түсіп, соңы суицид сияқты жаман жағдайларға апарып жататындары да бар. Сол себепті, әрбір баланы жеке қабылдап, медициналық тексеру нәтижесін ата-анасына ғана айту керек.
Әмина Құдайбергенова
