Еліміздегі жоғары оқу орындарының көшбасшысы – әл-Фараби атындағы Қазақ ұлттық университетінде ел Тәуелсіздігінің 30 жылдығына орайластыра бой көтерген Мәңгілік Ел сағатының салтанатты ашылу рәсімі өтті.
Айтулы шараға ҚазҰУ-дің басқарма төрағасы – ректоры Жансейіт Түймебаев, ҚР Конституциялық Кеңесінің төрағасы, Түлектер қауымдастығының президенті Қайрат Мәми, мемлекет және қоғам қайраткері Олжас Сүлейменов, ҚР Жоғарғы Сотының қылмыстық істер жөніндегі сот алқасының төрағасы Әбдірашит Жүкенов және «Экомед» инновациялық репродуктивті технологиялар академиясының бас директоры, ҚазҰУ-дің Құрметті профессоры Салтанат Байқошқарова қатысып, тарихы терең оқу орнының сән-салтанатын арттыруда ерекше көрік беретін бұл жобаның өзіндік мақсаты барын тілге тиек етті.
– «Мәңгілік Ел» сағаты – түлектердің өздері білім алып, қанат қаққан оқу орнының эндаумент даму қорына белсенді қолдау көрсетуінің жарқын көрінісі. Бұл бірегей архитектуралық нысан әлемдік деңгейдегі студенттік кампустың ғана емес, Алматы қаласының да көркін арттыра түскені анық. Ол Іле Алатауының қарлы шыңдары сияқты өзінің әсемдігімен тамсандырып, әрқайсымызға уақыттың қадірін білу қажеттігін еске алып тұрары хақ, – деген университет ректоры Ж.Түймебаев өзінің құттықтау сөзінде түлектердің университет өміріне белсенді атсалысып, игі дәстүрді жалғастыруға және жоғары білім беру жүйесінің дамуына сүбелі үлес қосып отырғанын атай келе, жобаны жүзеге асыруға атсалысқан меценаттарға алғысын білдірді.
Осы орайда қара шаңырақтың заң факультетінің 1985 жылғы түлектері бастама көтеріп, кампус аумағына орнату үшін үлкен циферблатты сағатты сыйға тартқанын айта кеткен жөн. Бұл шешімді қабылдаған ҚазҰУ Түлектері қауымдастығының Президиумы «Мәңгілік Ел» сағаты архитектуралық құрылысын салуға қаражат жинауды жариялаған еді. Өз кезегінде Қайрат Мәми жобаның басты мақсаты – ҚазҰУ қалашығының тұрғындары және қонақтарына оқу, жұмыс істеу және тұрмыс үшін жайлы орта құру екенін тілге тиек етті. Сонымен қатар, бастаманың қауымдастық мүшелерінің студенттік қалашықты көрікті экожүйе орталығына айналдыру ниетінен туындағанын да атап айтты.
Осылайша, студенттер мен оқытушылардың, қонақтардың көзайымына айналар «Мәңгілік Ел» сағатының ақ шымылдығы ашылған соң Түлектер қауымдастығының президенті Қайрат Әбдіразақұлы оқу орнының ректоры Жансейіт Қансейітұлына «Мәңгілік Ел» сағаты сәулет құрылысының куәлігін салтанатты түрде табыс етті. Меценаттардың ұсынысы бойынша «Мәңгілік Ел» сағаты биіктігі 19,3 метр стелаға орнатылған. Сағаттардың параметрлері үлкен және диаметрі 1600х1600 мм-ге жетеді.
Стела-сағаттың ашылуымен мемлекет және қоғам қайраткері Олжас Сүлейменов және биология ғылымдарының докторы Салтанат Байқошқарова құттықтап, ақжарма тілек арнады. Тәуелсіздік жылдарында 25 мыңға жуық сәбидің дүниеге келуіне себепші болған Салтанат Берденқызы: «Осы университеттің биология факультетінде білім алған кішкентай ғана қыз едім, енді, міне, уақыт өте келе ғылымға қосқан еңбегімнің арқасында «Университеттің Құрметті профессоры» деген атақ алдым. Мұның бәрі осындағы ұстаздарымыздың берген білімінің, тәрбиесінің нәтижесі. Мықты эмбриолог, генетиктердің барлығы да осы университеттің түлектері екенін мақтанышпен айтқым келеді» – деді.
Уақыттың қадірін сездіретін стела-сағаттың ашылу салтанатының соңы аталған оқу орнының студенттері шырқаған «Мәңгілік Ел» әнімен түйінделді.
Ұлбосын ИСАБЕК
Алматы қаласы
