Өнер жолында табысып, қос аққудай жарасып ғұмыр кешкен ел мақтанышы, Қазақ- станның еңбек сіңірген қайраткері, «Парасат» орденінің иегері Кендебай Темірбайұлы мен Қазақстанның Халық әртісі, «Құрмет» орденінің иегері Алмахан Кенжебекова жетпістің желкенін көтерді. Сонымен қатар, өнер жұлдыздарының отау құрғанына 50 жыл толды. Мерейтойы мен «Алтын тойды» Алашына сауын айтып тойлаған өнер майталмандары жетісулықтарға салиқалы ғұмырларынан сыр шертер жаңа қойылым ұсынды.
Бикен Римова атындағы Талдықорған драма театрында шымылдығын түрген Сұлтан- әлі Балғабаевтың «Мәңгілік өмір – махаббат» әлеуметтік музыкалық драмасы сахна саңлақтарының сырлы ғұмырынан сыр шертеді.
Жарты ғасыр жарасып ғұмыр кешкен, өнер мен өмірде бір-біріне серік болған Кендебай мен Алмахан махаббаты, ғибратты ғұмыры көпке үлгі. Саналы ғұмырын сахнаға арнаған Жетісудың қос жұлдызы өмірдің сан тарау белесін артқа тастап, елінің ұлы өнері жолында маңдай терлерін шүмектетті. Олар Талдықорған театрының топсасын бекітіп, қазығын қаққандар қатарында осы бір өнер отауының руханияттың бір тегершігі саналғанға дейінгі жолға өмірлерін арнады. Тағдырдың кермегі мен балын қатар татқан сахна саңлақтарының басынан кешкен алуан оқиғалар, сырлы сезім мен үлкен сыйластық сахна тілінде көрініс берді.
Қазақстанның еңбек сіңірген қайраткері Оразәлі Ақжарқын-Сәрсенбек режиссерлік еткен премьерада Кендебай Темір- байұлы мен Алмахан Кенжебекова басты рөлді сомдап, көрерменнің көңілін тебірентті. Адамның саналы ғұмырындағы киелі ұғымдарды айшықтаған қойылым соңында облыстық мәдениет, архивтер және құжаттама басқармасының басшысы Марлен Көлбаев сөз алып, сырлы да нұрлы ғұмыр иелеріне ақжарма тілегін жеткізді. Өз кезегінде киелі сахна саңлақтарының иығына шапан жапты.
Жетісу жерінің ғана емес, қазақ өнерінің мақтанышына айналған сырбаз жандардың өмірінен сыр аңдаған көпшілік қойылымнан тебіреніспен тарқасты.
Асыл СҰЛТАНҒАЗЫ
