Алматы облыстық мәслихатының дін, тіл, этносаралық қатынастар, ішкі және жастар саясаты мәселелері және индустриялық-инновациялық, көліктік-логистикалық даму, кіші және орта бизнесті, туризм мен спортты қолдау мәселелері бойынша комиссияларының бірлескен отырысы өтті. Жиынға облыстық мәслихат депутаттары мен БАҚ өкілдері қатысты.
Күн тәртібінде екі мәселе талқыланды. Бірінші болып сөз алған облыстық тілдерді дамыту жөніндегі басқармасының басшысы Б.Керімбек Қазақстан Республикасындағы тіл саясатын іске асырудың 2020-2025 жылдарға арналған мемлекеттік бағдарламасының орындалу барысы туралы баяндама жасады. Болат Бақбергенұлы жалпы облыста тіл саясаты бойынша атқарылып жатқан жұмысқа кеңінен тоқталды. Оның ішінде төрт бағытқа жекелей мән берді. Мәселен, латын графикалы әліпбиін қолданатын жазбаша коммуникацияға қатысушылардың үлесі артып келе жатқанын тілге тиек етті.
Мұнан кейін мемлекеттік тілді меңгерген тұрғындардың үлесін көрсететін соңғы мәлімет 92,5%-дың жыл соңына дейін өсетінін жеткізді. Ал үш тілді меңгерген тұрғындардың нақты саны қазіргі кезде 18%-ға артқан. Мемлекеттік бұқаралық ақпарат құралдарындағы қазақтілді контенттің үлесі 72%-ды құрап отыр. Осы жайында көптеген жағымды деректерді келтіріп, депутаттардың алдына нақты жұмыс нәтижесін ұсынды.
Баяндамашыға депутаттар қатарынан сауал да қойылды. Ондағы күрделі мәселенің бірі – ономастиканың жұмысы. Елді мекендерге, көшелерге ат берудегі жұмыстардың жай-жапсары сұралды. Бұл тұрғыда да басқарма басшысы нақты жауап қайтарып, заңды тұрғыда жұмыстардың жүргізіліп жатқанын айтып өтті. Екінші мәселеде облыстық дене шынықтыру және спорт басқармасының басшысы Н.Теңізбаевтың баяндамасы тыңдалды.
Онда дене шынықтыру мен бұқаралық спортты дамыту жөніндегі 2020-2025 жылдарға арналған кешенді жоспарының орындалу барысы туралы айтылды.
Нұрбақыт Молдахметұлы облыс бойынша спортта істелген іс пен жеткен жетістіктер жайлы баяндап өтті. Спорт саласында ауыз толтырып айтатын жаңалықтар өте көп. Мысалға бүгінгі күнге дейін 13 дене шынықтыру және сауықтыру кешені пайдалануға берілді. Тағы төрт кешеннің құрылысы жүргізілуде.
Биыл Мемлекет басшысы Қасым-Жомарт Тоқаевтың тапсырмасы бойынша облыста бұқаралық спортты дамыту орталығы ашылды. Аудан орталықтарында коммуналды мемлекеттік кәсіпорындар құрылып, оған ауылдық округтегі спорт нұсқаушылары бағынатын болды. Аталған орталық халықпен жұмысты нығайтып, тұрғындарды спортқа тарту мәселесімен айналыспақ. Сонымен қатар, үлкен спорттағы жетістіктер мен атқарылған іс-шара да тілге тиек етілді. Депутаттар тарапынан жаттығулардың ақылы екендігі жайлы сауал болды. Бұған басқарма басшысы мемлекеттік спорт мекемелерінде он сегіз жасқа дейінгі жасөспірімдердің спорттың барлық түрімен тегін жаттығатынын жеткізді.
Жиын соңында депутаттар жиналысты қорытындылап, толғақты мәселеге қолдау көрсету керектігі жайлы сөз қозғап, комиссияның кезекті отырысын аяқтады.
Ришад ТҰРҒАНБАЙ
Алматы облысы
