Ақиық ақын Мұқағали Мақатаевтың туған күніне орай Талдықорған қаласындағы №14 орта мектеп-гимназиясында поэзия кеші өтті. «Мұқағали – мәңгілік ғұмыр» атымен өрнектелген рухани шарада шайырдың асқақ жырлары оқылып, әуезді әндері әуеледі.
Мұғалім, ата-ана және оқушы үштігінің қатысуымен шырайын тапқан шарада 4 «Г» сынып оқушылары ұлы ақынның туған ел, туған жер мен Отан, табиғат пен қазақы құндылықтарға шығарылған өміршең жырларын нақышына келтіріп оқыса, ата-аналар мен ұлағат иелері кештің жоғары деңгейде өтуіне атсалысты.
Аталмыш мектеп директорының тәрбие ісі жөніндегі орынбасары Нұргүл Ахмадиева:
– Жалынды жырларымен елінің сөз өнерін асқақтатып, қазақ әдебиетінің қоржынына телегей жырларын тоғытқан Мұқағали Мақатаев шын мәнінде мәңгілік ғұмыр иесі. Оның әрбір жыры туған елінің жүрегінде жатталып қалды, – деп толғана келе арнау оқыды.
Сахнаның сәнін келтірген оқушылар да өзін таныстырып, өлең атты қасиетті туындыны термелеп берді. Сонымен қатар, бірқатар ата-ана мұзбалақ ақынның сөзіне жазылған әсем әндерді домбыраның сүйемелдеуімен әуелетті. Арнайы мектеп ұстаздарынан сайланған әділқазы алқасы поэзия кешінде өнер көрсеткен үштіктің (мұғалім, ата-ана, оқушы) еңбегін бағалап, қорытынды шығарды. Үздік деп танылғандар мен белсене қатысқандарға мақтау қағаздары мен диплом табыс етілді.
Осы ретте айта кету керек, 4 «Г» сынып оқушыларының арасынан бейнелеу өнеріне қалам тартып, ақын портретін салған жас таланттардың жұмысы көрмеге қойылды. Мазмұнды шараны 4 «Г» сынып оқушыларының сынып жетекшісі Ләззат Салтақова ұйымдастырды.
Асыл СҰЛТАНҒАЗЫ
Талдықорған қаласы
Алматы облысы
