Панфилов ауданының Аққұдық ауылында осыған дейін апатты деп танылып, жұмысын тоқтатқан 120 орынды мектеп қайта салынып, пайдалануға берілді. Бұл туралы «Жетісу» газеті мәлімдеді.
Конституция мен Білім күніне орай Аққұдық ауылындағы Ш.Байбатшаев атындағы 120 орынды мектеп салтанатты түрде ашылды. Бұған дейін апатты деп танылған бұрынғы мектеп өткен жылдың желтоқсан айында жұмысын тоқтатқан болатын. Жаңа мектепке қомақты қаржы бөлініп, мердігер компания «Нұр-Шапағат Кұрылыс» ЖШС нысанды мерзімінде аяқтады. Екі жыл кепілдік берілген мектеп іші толықтай заманауи материалдық базамен қамтылған.
Ашылу салтанатына қатысқан Панфилов ауданының әкімі Талғат Өмірәлиев Конституция күнімен құттықтап, өңірдегі білім саласында атқарылып жатқан жұмыстарға тоқталды.
— Қазіргі уақытта жыл сайын ауданымызда 2-3 мектепті түрлі бағытта кезең-кезеңімен жаңартып жатырмыз. Биылдың өзінде екі мектеп салынып жатыр. Бірнешеуіне күрделі жөндеу жұмыстары жүргізілмек. Міне, көптен күткен осы ауылдың мектебі сіздердің игіліктеріңізге берілді. Барша бүлдіршіндерді Білім күнімен құттықтаймын! — деді аудан басшысы.
Ал жаңа оқу жылын жаңа мектепте бастаған Заңғар Айтқожаның қуанышында шек жоқ. «Бұрынғы мектепте спорт залы жоқ болатын. Жазда далада жүретін едік. Енді жаңа мектепте бәрі бар. Мен спортпен айналысамын. Болашақта чемпион атанғым келеді. Мектеп салып берген барша ағаларға рахмет айтамын», — деді.
Жұрт игілігіне берілген мектеп 2736,84 шаршы метр аумақты алып жатыр. Орта білім беретін оқу ордасында 126 оқушы, 28 ұстаз бар. Жалпы, өңірде 27100 оқушы тіркелген. Жаңа оқу жылы қарсаңында аудан бойынша 2700 бала мектеп табалдырығын аттаса, оның 11-і Аққұдық ауылының бүлдіршіндері. Бұдан бөлек, Панфилов ауданында шекара шебіндегі ауылдардың мектептері жаңартылып жатыр. Басқұншы ауылындағы 300 орынды орта мектептің құрылысына, Қорғас ауылындағы орта мектепті күрделі жөндеуге көлемді қаражат бөлінген. Қазіргі уақытта екі нысанның да құрылыс жұмыстары басталған. Сондай-ақ, Кішішыған ауылындағы орта мектептің ғимаратын күрделі жөндеуден өткізуге жобалау-сметалық құжаттарын дайындауға конкурс жарияланған. Келер жылы екі мектепке күрделі жөндеу жүргізілмек.
«ЖЕТІСУ-АҚПАРАТ»
