«Аграрлық несие корпорациясы» АҚ Еңбекшіқазақ, Талғар аудандарындағы ауылшаруашылығы өнімдерін өңдеу кәсіпорындарына баспасөз турын ұйымдастырды. Шараға «Аграрлық несие корпорациясы» АҚ басқарма төрағасы Нармұхан Сарыбаев қатысты.
«Басты бағыттардың бірі – мал шаруашылығы өнімдерінің экспорттық әлеуетін арттыру. Осы мақсатта мал шаруашылығымен айналысатын фермерлер атқаратын пирамида қалыптасуда. Пирамиданың жоғары жағы – ет комбинаттары, өйткені оларда экспортқа шығару мүмкіндігі мен тиісті технологиялар бар, – деген басқарма төрағасы фермерлік сала кеңейіп, ұлғайғанда діттеген нәтижеге қол жеткізетіндіктерін тілге тиек етті. – Жергілікті бағдарламаның толыққанды жүзеге асуы үшін 10 жыл ішінде 1 млн. бас мал экспорттауымыз қажет, бұл бізге ірі қара мал санын 5 млн.-ға арттыру қажеттігін көрсетеді. Әрине, бұл Қазақстан экономикасына жаңа деңгейге көтерілуге мүмкіндік береді».
Мал шаруашылығы ғана емес, сонымен қатар, балық және өсімдік шаруашылығындағы экспорттық өнім пайызының артуы аграрлық сектордың дамуын бірнеше есеге арттыра түседі. Осы бағытта атқарылып жатқан жұмыстар барысын байқау мақсатымен баспасөз турына қатысушылар мен «Аграрлық несие корпорациясы» АҚ басшылығы облыстағы экспортқа жұмыс істейтін бірнеше кәсіпорынды аралады.
Алғаш боп ат басын бұрған Еңбекшіқазақ ауданына қарасты сыйымдылығы 1000 тоннаға жететін жеміс сақтау қоймасының құрылысы аяқталған. «Нокина» ШҚ жеміс сақтауға арналған қойма салып, «Талғар» несие серіктестігі арқылы Аграрлық несие корпорациясының 262 млн. теңге қаражаты есебінен тоңазытқыш құрылғыларын орнатқан. Аталған шаруа қожалығының негізгі қызметі – бағбаншылық, сондай-ақ, олар табиғи алма шырынын өндірумен айналысады. Шаруа қожалығында 20, 40 гектар аумақта алманың «Голден Делишес» және «Старкримсон» сұрыптары өсіріледі, оның 15,4 гектар аумағын тамшылатып суару жүйесі және торлы жүйе қолданылатын экстенсивті бақтар және 5 гектар аумағын интенсивті бақтар алып жатыр. Бүгінгі таңда компания шырындары мен алмалары Ресей және жақын шет мемлекеттерге экспортталады. Алдағы уақытта Қытай нарығына шығару көзделген.
Ал Қасымбек ауылындағы ет өңдеу кешенінің құрылысы аяқталуға таяу. «EmpireFood» ЖШС Аграрлық несие корпорациясының қаражатына ет өңдеу кешеніне қажетті жабдықтар сатып алған. Жобаның жалпы құны 2,4 млрд. теңгені құрайды. Оның 1,3 млрд. теңгесі жабдықтарға, құрылыс-монтаж жұмыстарына 0,7 млрд. теңге, айналым қаржысына 430 млн. теңге жұмсалады. Бір ауысымда ет өңдеу кешенінің өндірістік қуаты 1120 басты құрамақ. Осы күні өз жұмысын бастап кеткен кәсіпорын жыл соңына дейін толық қуатта жұмыс істеуді жоспарлауда. Аталған ет өңдеу кешені осы өңірдегі ауылшаруашылығы саласындағы перспективті компаниялардың бірі. Ол өңірлік және халықаралық деңгейде өткізу нарығын кеңейтуге, негізгі тұтынушыларға сатылым көлемін ұлғайтуға, сондай-ақ, жақын шетелдердің нарықтарына шығатын дистрибьюторларды тартуды көздейді.
– Шаруашылық мұндай кәсіпорындардың көмегінсіз өз бетінше экспортқа шыға алмайды. Бұл, біріншіден, өсірген малды көңілге қонымды бағамен сатуға жақсы мүмкіндік берсе, екіншіден, өнім өткізу тұрақтылығын береді. Нәтижесінде фермер шаруашылығын одан әрі алаңсыз дамыта береді. Өйткені, өз өнімін сенімділікпен сату мүмкіндігі бар, – деді басқарма төрағасы.
Мал шаруашылығынан басқа елімізде балық өндірісі де дамып келеді. Соның бірі «Теплоинвест» ЖШС Аграрлық несие корпорациясының қаражатына балық зауытына қажетті жабдықтар алып, ғимаратқа жөндеу жұмысын жүргізген. Жобаның жалпы құны 487 млн. теңге. Балық зауытында филе дайындалады, жаңа мұздатылған және кептірілген, жалпы көлемі 1500 тоннаға жуық балық өңделеді. Жаңа балық өңдеу зауыты өз өнімдерін ел аумағымен қатар ТМД және Қытай нарығына жөнелтеді.
Өткен жылы экспортқа 297 тонна, ішкі нарыққа 91 тонна өнім өндірген. Жоғарыда аталған үш жобаның инвестициялық бөлімі «Агроэкспорт» несие бағдарламасы шеңберінде 8 пайыздық сыйақы мөлшерлемесі бойынша қаржыландырылады. Агробизнес бағдарламасы аясында айналым капиталы жылдық сыйақы мөлшерлемесі бойынша 16 пайыздық мөлшерлемені субсидиялауды ескере отырғанда жылына 11 пайызды құрайды.
«Аграрлық несие корпорациясы» АҚ басшылығы қаржылай көмектің тиімді жүзеге асырылуына көз жеткізу үшін барған үш кәсіпорынның одан әрі даму перспективалары туралы әңгіме өрбіді. Өз тарапынан кәсіпорындар басшылығы қол жеткізген жетістіктері туралы мақтанышпен баяндап, бұл орайда, «Аграрлық несие корпорациясы» АҚ-на жобаларды қолдап, қаржылай көмек көрсеткендері үшін алғыстарын білдірді.
Ұлбосын ИСАБЕК
Еңбекшіқазақ, Талғар аудандары
