«Cу мәселесінің үлкен әлеуметтік маңыздылығын ескере отырып әрбір өңір, әсіресе ең төмен көрсеткіштері бар облыстар жұмысты жандандыруы керек. Индустрия министрлігі бақылауды барынша күшейтуі тиіс», – деді ҚР Премьер-Министрі Әлихан СМАЙЫЛОВ Үйлестіру штабының отырысында.
Аталған жиында елді мекендерді сумен қамтамасыз ету шаралары қаралды. Алғашқы болып баяндама жасаған Индустрия және инфрақұрылымдық даму министрі Марат Қарабаев Президент тапсырмасына сәйкес 2025 жылдың соңына дейін халықты сапалы ауызсумен 100% қамтамасыз ету жоспарланып отырғанын жеткізді. Бүгінгі таңда ауызсуға қолжетімділік қалаларда 98,4%-ды, ауылдарда 94,5%-ды құрап отыр. Ең аз қамту Абай, Ақмола және Жамбыл облыстарының қалаларында, Ақмола, Қостанай, Солтүстік Қазақстан облыстарының ауылдарында тіркелген екен.
Биыл сумен жабдықтау, су бұру жүйелерін салу және реконструкциялауға арналған 402 жобаны іске асыруға республикалық бюджеттен 280 млрд. теңге бөлінген. Мемлекет басшысы тапсырған мерзімге дейін қалған 25 қала мен 1 395 ауылдың халқын таза ауызсумен қамтамасыз ету қажет. Осыған байланысты республиканың әрбір елді мекенін қамтитын тиісті жоспар әзірленген. Оның ішінде іздестіру-барлау жұмыстарын жүргізу, жобалау-сметалық құжаттаманы әзірлеу және құрылыс-монтаждау жұмыс барысына мониторинг жүргізіледі.
Топтық су құбырларын салу мен оны реконструкциялау жұмыстарының барысы туралы ҚР Экология және табиғи ресурстар вице-министрі Нұркен Шәрбиев баяндаса, өз кезегінде Қостанай, Түркістан, Батыс Қазақстан облысының әкімдері өңірлерде атқарылып жатқан шараларға тоқталды.
Премьер-Министр мамыр айының басында Үкімет отырысында ауызсу жобалары бойынша «аяқталмаған құрылыстар» туралы айтылғанын еске салды.
Премьер-Министр жиын барысында жүргізіліп жатқан жұмыстағы тағы бір маңызды мәселе – су саласын цифрландыру екенін атап өтті.
– Сумен жабдықтаудағы өндірістік процестерді автоматтандыру суды тиімді тұтынуды қамтамасыз етеді. Бұл судың шығындарын және желілер мен жабдықтардың бұзылуын азайтып, қаржы үнемдеуге мүмкіндік береді. Осы бағыт шеңберінде ағымдағы жылдың соңына дейін «Су ресурстары» модулі бар табиғи ресурстардың интерактивті картасы енгізілуі тиіс. Сондай-ақ, барлық қондырғылар мен гидроқұрылыстар есептеу құралдарымен жабдықталуы керек», – деген Әлихан Смайылов, өз кезегінде ауызсу бойынша «сақалды құрылыстардың» барлығын тездетіп аяқтау мәселесін пысықтауды, өңірлер әкімдіктері келесі жылы су беру жоспарланып отырған 115 елді мекен бойынша жобалау құжаттарын осы жылдың соңына дейін аяқтауды қамтамасыз етуді, 22 ауылда іздестіру-барлау, сондай-ақ, 20 қаланы сумен жабдықтау және су бұрудың өндірістік процестерін автоматтандыру бойынша жобалау құжаттарын дайындау жұмыстарын аяқтауды тапсырды.
Асыл СҰЛТАНҒАЗЫ
