Президент Қасым-Жомарт Тоқаевтың айтуынша, Орталық Азия мемлекеттерінің ішкі жалпы өнімінің көлемі жарты триллион доллар межесіне таяп, соңғы 5 жылда өңірдегі сауда айналымы 10 миллиард доллардан асты. Қытаймен арадағы сыртқы сауда 95 миллиард долларға, тауар айналымы 44 миллиард долларға жеткенін атап өткен Мемлекет басшысы инвестициялық жобалар арқылы байланыс нығая түсетінін, бірлескен жобаларды іске қосуға, тауар номенклатурасын көбейтуге, көршілес ел нарығында сұранысқа ие өнімдер экспортын ұлғайтуға ерекше мән берілетінін, жоғары өнім шығаратын технологиялық кәсіпорындар ашылатынын, тиімді су үнемдеу әзірлемелерін қолданысқа енгізу бағытындағы ынтымақтастық жүзеге асатынын, бұл бағыттағы экономикалық ықпалдастыққа «Қорғас» халықаралық шекара маңы ынтымақтастық орталығы тың серпін беретінін алға тартты.
Одан бөлек, Еуропа мен Азия елдерін жалғайтын логистикалық хаб арқылы былтыр тасымалданған жүк көлемі 12 пайызға артып, 211 мың контейнерден асқанын, Қытайдан Еуропаға құрлық жолдарымен жөнелтілетін жүктің 85 пайызы Қазақстанға тиесілі екенін, «Батыс Қытай – Батыс Еуропа», Транскаспий халықаралық көлік дәлізі және «Солтүстік – Оңтүстік» секілді маңызды транзиттік бағыттармен ұштастыру көзделгенін атап өткен Қасым-Жомарт Тоқаев Каспий теңізіндегі айлақтарды жаңғырту және цифрландыру, жүк терминалдарын салу, сондай-ақ жүк кемелері өндірісін жолға қою бойынша жүйелі шаралар қабылдап жатқанын еске салды.
Сондай-ақ, Қазақстан діни экстремизммен, терроризммен, сепаратизммен, есірткі тасымалдаумен, заңсыз қару-жарақ саудасымен, заңсыз көші-қонмен және адам саудасымен, халықаралық киберқылмыспен ымырасыз күрес жүргізеді.
Мәди АЛЖАНБАЙ
