Ел экономикасындағы тұтыну бағаларының динамикасы тұрақталып, маусымдық өнімдердің құны төмендей бастады, – деп хабарлайды 7-su.kz ақпараттық порталы.
Қазақстан Республикасындағы 2026 жылғы шілде айында инфляцияның айлық деңгейі 0,6% құрады, бұл маусым айындағы көрсеткіштен төмен. Жаз мезгілінің ортасында бағаның ең көп төмендеуі маусымдық жеміс-көкөніс өнімдерінің жекелеген түрлерінде тіркелді. Атап айтқанда, қиярдың бағасы 22-23%, қызанақ 17-18%, сәбіздің бағасы 5-6%, банан 4-5%, алма 2-3%, апельсин 2-3%, лимон мен картоп 1-2%-ға арзандады. Сонымен қатар, жұмыртқа 1-2%, арпа жармасы 1-2% төмендеді. Азық-түлікке жатпайтын тауарлар арасында пайдаланылған жеңіл автомобиль бағасы 3-4%, электр еттартқыш 2-3%, кір сабын 1-2%, смартфондар мен көзілдіріктер 1-2% арзандады.
Жылдық мәнде 2026 жылғы шілдеде инфляция деңгейі 10-11% шамасын құрады. Азық-түлікке жатпайтын тауарлардың бағасы 11-12%, азық-түлік тауарларының бағасы 10-11%, ақылы көрсетілетін қызметтердің бағасы 9-10% өсті. Өткен жылдың шілде айымен салыстырғанда жеміс-көкөніс өнімдерінің жекелеген түрлері бойынша бағаның төмендеуі жалғасты. Атап айтқанда, қияр бағасы 31-32%, қызанақ 26-27%, пияз 10-11%, сарымсақ 8-9%, апельсин 7-8%, алма 4-5% төмендеді. Сонымен қатар, азық-түлік тауарлары арасында күріш бағасы 4-5%-ға арзандады. Азық-түлікке жатпайтын тауарлар арасында 2025 жылғы шілде айымен салыстырғанда отандық құрастырылған жаңа жеңіл автомобильдің бағасы 16-17%, кондиционер 10-11%, медициналық термометр 7-8%, медициналық бинт 6-7%-ға төмендеді. Тұтыну бағаларының индексі инфляция деңгейін сипаттайтын көрсеткіш ретінде ай сайын есептеледі. Бақылау 537 тауар мен қызмет түрі бойынша жүргізіліп, барлық ақпарат азаматтарға қолжетімді арнайы интерактивті дашбордта жарияланады. 2026 жылғы қаңтардан бастап тұтыну бағалары индексін есептеу құрылымында азық-түлік тауарларының үлесі 41-42%, азық-түлікке жатпайтын тауарлар 28-29%, ақылы қызметтер 30-31% құрайды.
Сарапшылардың пікірінше, бағаның тұрақталуы мен кейбір тауарлардың арзандауы халықтың сатып алу қабілетін қолдауға септігін тигізеді.
