«Таза Қазақстан» бағдарламасы аясында «Қамқор» арнаулы әлеуметтік қызмет көрсету орталығы коммуналдық мемлекеттік мекемесінің ұжымы мекеме аумағында ағаш отырғызу бойынша экологиялық акция өткізді.
Аталған іс-шара қоршаған ортаны қорғау, табиғатқа деген жанашырлықты арттыру және экологиялық мәдениетті қалыптастыру мақсатында ұйымдастырылды.
Көктемнің жаймашуақ күнінде өткен игі бастамаға мекеме қызметкерлері мен тәрбиеленушілер белсенді түрде қатысты. Жалпы саны 78 адам жұмыла кірісіп, орталық аумағына 21 түп жеміс ағашының көшеттерін, атап айтқанда алма мен алмұрт отырғызды. Бұл тек көгалдандыру жұмысы ғана емес, сонымен қатар табиғатты аялауға бағытталған тәрбиелік мәні зор шара.
ІҰжым мүшелері мұндай акциялар табиғатқа қамқорлық жасаумен қатар, адамдар арасындағы ынтымақ пен бірлікті нығайта түсетінін атап өтті.
Мекеме басшылығының айтуынша, «Таза Қазақстан» бағдарламасы аясында өткізілетін шаралар алдағы уақытта да жалғасын табады. Бұл бастамалар арқылы экологиялық жауапкершілікті арттырып қана қоймай, мекеме аумағын көркейтуге, жасыл желекті көбейтуге ерекше көңіл бөлінбек.
Осындай игі істер – келешек ұрпаққа таза әрі көрікті табиғат қалдыру жолындағы маңызды қадам.
«Жетісу-Ақпарат»
