Ақорда алдағы күндері өтетін маңызды халықаралық іс-шаралар аңдатпасын жариялады, – деп хабарлайды 7-su.kz ақпараттық порталы.
20-23 сәуір аралығында Мемлекет басшысы Қасым-Жомарт Тоқаевтың шақыруымен Моңғолия президенті Ухнаагийн Хурэлсүх Қазақстанға мемлекеттік сапармен келеді.
«Жоғары деңгейдегі келіссөздер барысында екі елдің саяси, сауда-экономикалық және мәдени-гуманитарлық ынтымақтастығын нығайту перспективасы талқыланады», – деп жазылған хабарламада.
22-24 сәуір күндері Астанада Өңірлік экологиялық саммит өтеді. БҰҰ аясында құрылған жаңа диалог алаңының мақсаты – Орталық Азияның орнықты дамуына ортақ көзқарас қалыптастыру, сондай-ақ климаттық және экологиялық сын-қатерлерді еңсеру бойынша бірлескен шешімдер әзірлеу. Саммитке мемлекет және үкімет басшылары, халықаралық ұйымдардың жетекшілері қатысады.
22 сәуірде Президент Қасым-Жомарт Тоқаевтың төрағалығымен Халықаралық Аралды құтқару қорының құрылтайшы мемлекеттері басшыларының кеңесі өтеді.
