Есімде сол шақ, алаңсыз, албырт сәттерім,
Бала едім, қазір ойласам көп-ау әттеңім.
Ұялшақ па едім, қызғаншақ па едім, кім білсін,
Жасырып жүрдім көңілдің шуақ көктемін.
Облыстық мәдениет, архивтер және құжаттама басқармасының бастамасымен облыстық халық шығармашылық орталығы ұйымдастырған «Жыр жауһары» поэзия сағаты ақын, Қазақстан Жазушылар, Журналистер одағының мүшесі Нүсіпбай Әбдірахымның шығармашылығына арналды. Поэзия сағаты көпшілікке етене таныс дәл осы «Сары қыз» өлеңімен басталды. Нүсіпбай Әбдірахымның поэзиясы тұтас бір әлем. Өлеңнің әр тармағында шындық, қуаныш, бақыт та бар. Қаламын қару етіп, талай жырды түлеткен ақынға арналған поэзия сағатында оның өлеңдері оқылып, әсем әндері шырқалды.
Поэзия – руханияттың мәйегі мен маңызы. Ол алдымен ұлттың абыройына мөр, арманына жол болатын құнды жәдігер. Сондықтан өлеңді құрметтеу әркімге парыз. Өлең жазу үшін адам алдымен өмірдің жақсы жақтарын, сәулелі сәттерін көре білуі тиіс. Ал оны көру үшін ақынға үлкен парасат, жылы жүрек, адами биік болмыс керек. Қаламын қару еткен біздің кейіпкеріміз Нүсіпбай Әбдірахымның бойында осы аталған қасиеттің бәрі де бар. Сондықтан да арда ақынның жүрегінен шыққан жырлары халық жүрегінен орын алатыны сөзсіз.
Қасиетті қара сөздің қадірін терең түсінетін жырсүйер қауым шуақты жырмен сусындау үшін облыстық С. Сейфуллин кітапханасына жиналды. Көңілі таза, ниеті түзу ақынның саф көңіліне шомған зиялы қауым өкілдері, туған-туыс, дос-жарандары, әріптестері мен ақын мұрасын қадір тұтқан жалынды жастар келіп әдемі кештің көзайымы болды. Жыр сүлейі Сүйінбай, жыр дүлдүлі Жамбыл, тау суындай тасқындаған Сарбас, «өлеңнің қара жорғасы» Үмбетәлі ақынның шығармаларымен сусындап, тәлім-тәрбиесінен өнеге алған, кешегі өмірден өткен Есенқұл Жақыпбековпен сырлас дос болған Нүсіпбай Додабайұлы жайлы бұл кеште көптеген жылы естелік айтылды. Көксу аудандық Мұқыры халық театрының өнерпаздары ақынның жақұт жырларын оқып, көрермен ықыласына бөленді.
Тағдыр табыстырған адал досы, халықаралық «Алаш» әдеби сыйлығының иегері Әміре Әрін ақынның адами қасиетін, азаматтық болмысын, кескін-келбетін, әсерлі естеліктерін тебірене әңгімеледі. Ардагер қаламгер Әли Ысқабай ақынның шығармаларына тоқталып, ақ батасын арнады.
Облыстық «Jetisý» газетінің бас редакторы Жұматай Оспанұлы қасиетті қара шаңыраққа тілші болып келгенде ағаның қақморлығын көріп, жанашырлығын сезінгенін тілге тиек етті. Бас редактордың орынбасары, журналист Ришад Тұрғанбай сөз сөйлеп, қаламгердің еңбекқорлығын, асыл қасиеттерін жас ұрпаққа үлгі етті. Шырайлы шығармалары әр қазақтың жүрек төрінен орын алуын тілеп, ғасырдан асқан тарихы бар атабасылым «Jetisý» газетінің ақсақалына алғыс айтып, журналистика саласындағы шәкірттері Нүсіпбай Әбдірахымнан жауапкершілікті, тазалықты, адалдықты, тиянақтылықты үйрену керектігін сөз етті.
Ақын, қарымды қаламгер, шындықты ғана дерек пен дәйекке сүйене отырып жазуға бейім ақынға арналған поэзия сағаты ғажайып әнмен аяқталды.
Еңлік КЕНЕБАЙ
