Ұстаз ұстанымының жақсы болмағы керек. Бүгінде жеткіншектердің жан дүниесін түсінетін білікті тәрбиеші педагогтар қоғамға ауадай қажет. Сондай жанның бірі Атамекен ауылындағы А. Розыбакиев атындағы орта мектебінде талай жылдан бері еңбек етіп келе жатқан, қазақ тілі мен әдебиетінен дәріс беріп жүрген Рыскүл Каликова. Ол нағыз өз ісінің маманы.
Өз мамандығын жауапкершілікпен таңдаған Рыскүл шәкірттерінің болашағына бейжай қарамайды. Оқушыларына әр нәрсені ыждағаттылықпен түсіндіреді. Ұйғыр сыныптарына мемлекеттік тілдің қыры мен сырын үйретуден жалыққан емес. Нәтижесінде сапалы білім, саналы тәрбие беріп, ұжымның, ата-аналардың алғысына бөленіп жүр.
Жоғары сыныптарға әдебиеттегі ақын-жазушылардың өмірлерін, қазақтың салт-дәстүр, әдеп-ғұрпын танытып қана қоймай, талай рет ауданда ашық сабақтар, өнегелі тәрбие сағаттарын өткізді. «Ұстазы жақсының ұстамы жақсы» демекші, білікті маман мектептегі драма үйірмесін де басқаруда. Оқытқан шәкірттері Шұғыла мен Жақсылық қазіргі уақытта жоғары оқу орнында білім алуда. Оның дайындаған оқушылары ауданда өткен «Jaidarman» жарыстарынан бас жүлде, мерекелік жарыстарда мектеп намысын қорғап, Мақтау қағаздарын алды.
Рыскүл қазіргі заман талабына сай жастарға тәлімгер. Ата-аналармен де тығыз байланысып отырады. Жеткіншектерді рухани тәрбиеге бағыттап, әсіресе ер балаларды қайырымдылыққа, азаматтыққа жетелеуде. Жетекшілік қызметті абыроймен атқарып жүрген жан.
Қай уақытта да ұстазға терең білім, үлкен жүрек қажет. Осындай қажеттерді бойына сіңірген ұстаздың еңбегі де бағаланып, Алғыс хат, Мақтау қағаздарымен марапатталды. Рыскүл отбасында аяулы ана. Ұл-қыздары жоғары маман. Жолдасы Тұрғанбай ауылға сыйлы азамат.
Талапшыл да, талантты ұстазға шығармашылық табыс, еңбегіне береке тілеймін.
Тоқтаргүл КИІЗБАЕВА,
зейнеткер ұстаз
Атамекен ауылы,
Панфилов ауданы
