Ет пен теріден жаралған соң бас ауырып, балтыр сыздамай тұрмайды. Бірақ қазекем сырқаты сыр бергенде болмаса емделуге бара қоймайды. Содан барып ауруы асқынып, созылмалы кеселге айналып кетеді. Ал созылмалы сырқатты бірқалыпты ұстау үшін жылына бірнеше рет ем алып тұру керек. Уақытында емделмеудің бірден-бір сыры – біраз уақытта аяғымнан тұрып кетермін деп бейғам жүре беруде.
Ел аузында шындыққа келетін мынадай әзіл бар. Еврейлер дәрігерге «Мен ауырмауым керек» деп алдын алу шарасын жасатады екен. Ал орыстар: «Сырқаттанайын деп тұрған сияқтымын» деп ем алады екен. Ал қазекем: «Қолымның сыздап ауырып жүргеніне бір ай болды. Күп болып ісіп кетті», – деп келеді екен.
Мысалдан байқап тұрғаныңыздай, қазақ дәрігерге ауруы әбден асқынғанда барады. Бұл кезде дәрігер ісікті қайтаруға қауқарсыз болып қалуы мүмкін. Мұны айтып отырған себебім, біз де ауруханаға сырқатымыз асқынғанда келдік. Бір палатада жатқан адамдардың барлығы мен сияқты емделмей жүре беріп, кеселін асқындырып алғандар. Біріміз қант диабеті қинағанда, екіншісі қан қысымы 200-ден асып кеткенде, үшіншіміз бронхиттен демала алмағанда келіппіз. Жасыратыны жоқ, созылмалы сырқатқа қойылатын талапты орындамайтынымыз да рас. Дәрігердің нұсқауын «құлаққа ілмей», ішпе дегенді ішіп, жасама деген емді жасап, соңында дәрігерді сарсаңға саламыз. Алайда айналайын ақ желеңді абзал жандар жаны қиналған сырқатты аман алып қалу үшін бар мүмкіндікті жасайды.
Біз Ақсу ауданының орталық ауруханасына созылмалы сырқатымыз асқынып, ауыр жағдайда жеткізілдік. Бәріміз кеселіміз асқынып, ауруханаға бірімізден кейін біріміз әл-дәрменіміз құрып түстік. Сондай сәтте аурухананың емдеу бөлімінің меңгерушісі Жандос Есжанов жанымызды аман алып қалу үшін күн-түн демей күресті. Нәтижесінде бетіміз бері қарады.
Емделушілер Жандос дәрігердің кәсіби біліктілігі мен табандылығына, мамандығына деген адалдығына ризашылық білдіреміз. Ол басқаратын мекеменің барлық дәрігерлері өз істерінің нағыз мамандары. Гиппократ антына адал жандар. Емделіп жатқандардың барлығы алғыстарын жаудырып жатады.
Жандос басқарып отырған емдеу бөлімінің ұжымына береке-бірлік, еңбектеріне табыс, отбасыларына амандық тілейміз.
Алғыс айтушылар: Дүйсен Мұхаметшарұлы, Рахметолда Сексенбаев, Мейрамгүл Байболов, Алмас Божыбаев, Камалия Мұқашева, Ілияс Рахманов, Фатима Манақова.
Ақсу ауданы
