Алмалы ауылдық кітапханасында Социалистік Еңбек Ері Күмісбек Буашевті еске алу жиыны өтті. Жиынға шақырылған қонақтар «Адам мәртебесі жоғары» атты фотогалереямен танысып, мектеп оқушыларының қатысуымен «Қойшының бір күні» деп аталған қойылымды тамашалады және Күмісбек Буашевтің ерен еңбегі көрініс табатын деректі фильмнен үзінді көрді.
Күмісбек Буашев ХХ ғасырдың қилы кезеңдерін бастан өткеріп, еңбекпен ел есінде қалған дара тұлға. 1906 жылы бұрынғы Семей облысы, Шұбартау ауданында дүниеге келген ол 1928 жылы Кеңес үкіметі ұйымдастырған феодалдарды тәркілеу науқанының зардабынан туған ашаршылыққа куә болған жан. Сол қиын кезеңде анасымен және туған-туыстарымен бірге Жетісу жеріне, қазіргі Сарқан ауданына қоныс тепкен. Осы өңірде «Қызыл ту» ұжымшарына мүше болып кірген. Бұл ауыл кейін Новопокровка деп аталып, «Энергия» ұжымшарын құрады.
1941–1943 жылдары еңбек армиясында болған Күмісбек Буашев денсаулығына байланысты әскерден босатылған соң ауылшаруашылығында еңбек етіп, еңбекқорлығы мен табандылығының арқасында жоғары марапаттарға ие болды. Адал еңбегінің айғағындай «Тыңды көтергені үшін» медалімен марапатталады. 1958-1959 жылдары жүз саулықтан жүз елу қозы алып, жоғары көрсеткішпен ерекшеленеді. 1966 жылы еселі еңбегі әділ бағаланып, КСРО Жоғарғы Кеңесінің Жарлығымен «Социалистік Еңбек Ері» атағы берілді. Өмірбаяны Қазақстан Республикасының «Алтын кітабына» жазылған.
1964 жылы Ленин орденімен марапатталған ол «Қазан төңкерісі», «Құрмет белгісі» ордендерінің иегері. Жыл сайынғы жемісті еңбегі ескеріліп, Мәскеу қаласындағы Бүкілодақтық халық шаруашылығы жетістіктері көрмесінің үш алтын, екі күміс медалін жеңіп алған. Мал шаруашылығын өркендетудегі жүйелі еңбегінің нәтижесінде Қазақ КСР Жоғарғы Кеңесінің депутаты болып сайланған. 1986 жылдың 18 тамызында 80 жасында дүниеден өткен Күмісбек Буашевті жерлестері мақтан тұтады. Еңбек Ерінің атына Алмалы ауылында және аудан орталығы Сарқан қаласында көше берілген.
Жиында Күмісбек Буашевтің ұлы, ауылшаруашылық саласының ардагері, зоотехник-ғалым Құрман Күмісбекұлы, ұлағатты ұстаз, педагогика саласының ардагері Ұлжан Күмісбекқызы, Сарқан ауданының Құрметті азаматтары Сәдуақас Садықов, Жомарт Игіман сөз алып, еңбегімен ел есінде қалған тұлға туралы естеліктерімен бөлісті.
Кездесуде әсем ән шырқалып, әсерлі әңгімелер өріс алды. Шараны аудандық кітапхананың әдіскері Айсұлу Сейполдина қорытындылап, «Жұмысшы мамандығы» жылына орай ұйымдастырылған еске алу жиынына қатысқан аға буын өкілдеріне ризашылық білдірді.
Жақсылық ИГІМАН
Сарқан ауданы
