Жетісу облысында жастардың саяси сауаттылығын арттыруға, азаматтық белсенділігін қалыптастыруға және көшбасшылық әлеуетін дамытуға бағытталған «Саяси серпін» жобасы аясында «Жас саясаткер мектебінің» салтанатты ашылу рәсімі өтті.
Жобаның мақсаты – қоғамдық-саяси үдерістерге белсенді қатысатын, жауапкершілігі жоғары, жаңа көзқарастағы жас көшбасшыларды қалыптастыру. Осы бағытта қатысушыларға саяси білім мен тәжірибелік дағдыларды ұштастыратын арнайы оқу бағдарламасы ұсынылды.
Бағдарлама аясында жастар тәжірибелі сарапшылар мен республикалық деңгейдегі спикерлердің дәрістеріне қатысып, саяси коммуникация, шешендік өнер, көшбасшылық, мемлекеттік басқару, жобалық менеджмент және қоғамдық қызмет бағыттары бойынша білімдерін жетілдіреді. Сонымен қатар тренингтер, пікірталастар мен тәжірибелік сабақтар арқылы теориялық білімдерін іс жүзінде қолдануға мүмкіндік алады.
«Жас саясаткер мектебі» – жастардың азаматтық жауапкершілігін арттыруға, қоғамдық бастамаларға белсенді қатысуына және көшбасшылық қабілеттерін дамытуға бағытталған маңызды білім беру алаңы. Жоба өңір жастарының әлеуетін арттыруға, олардың жаңа идеялары мен бастамаларын қолдауға және қоғамдық-саяси өмірге белсенді араласуына мүмкіндік береді.
Алдағы уақытта жоба аясында түрлі семинарлар, тренингтер, кездесулер мен тәжірибелік іс-шаралар өткізіліп, жастардың кәсіби және тұлғалық дамуына жан-жақты қолдау көрсетілетін болады.
Жоба «Жетісу облысының қоғамдық даму басқармасы» мемлекеттік мекемесінің қаржылық қолдауымен жүзеге асырылады.
