Құрылтай депутаттарын сайлау күні Талдықорғанда тұрғындарға көтеріңкі көңіл-күй сыйлап, ұлттық тағамдар мен жергілікті өнімдерді дәріптеуге бағытталған «Жетісу Бауырсақ & Apple Fest» жәрмеңкесі ұйымдастырылды.
Жәрмеңкенің басты ерекшелігі – арнайы мобильді фуд-тракта қала тұрғындарына жаңа піскен ыстық бауырсақ пен Жетісудың жергілікті бақтарында өсірілген алмадан дайындалған табиғи шырын ұсынылды.
Дауыс беруге қатысқанын растайтын стикерін немесе арнайы белгісін көрсеткен тұрғындар ыстық бауырсақтан ауыз тиіп, балғын алма шырынынан дәм татты.
Жәрмеңке атауының да өзіндік мәні бар. Бауырсақ – қазақ халқының қонақжайлығы мен молшылығының белгісі болса, алма – Жетісу жерінің берекесі мен табиғи байлығын айшықтайтын өнімдердің бірі. Осы екі дәмді бір бастама аясында ұсыну арқылы өңірдің ұлттық болмысы мен ерекшелігі көрініс тапты.
Осылайша, «Жетісу Бауырсақ & Apple Fest» ұлттық тағам мен жергілікті өнімді дәріптеп, тұрғындарға ерекше көңіл-күй сыйлаған жарқын бастамалардың біріне айналды.
