Жетісу облысында уылдырық шашу кезеңіне байланысты жүргізіліп жатқан профилактикалық іс-шаралар барысында су биоресурстарын заңсыз тасымалдау дерегі анықталды, – деп хабарлайды 7-su.kz ақпараттық порталы.
Оқиға Алматы – Өскемен автожолының оңтүстік бағытында тіркелген. Жетісу облысы полиция департаментінің табиғатты қорғау полициясы, Қаратал аудандық балық инспекциясы және патрульдік полиция батальонының бірлескен жасағы Setra маркалы автобусты тексеру үшін тоқтатқан.
Тексеру барысында 64 жастағы жүргізушінің уылдырық шашу кезеңінде қолданыстағы тыйымға қарамастан, тиісті рұқсат құжаттарынсыз әртүрлі балық түрлері салынған төрт қапты тасымалдағаны анықталған.
Мамандардың айтуынша, мұндай заңсыз әрекеттер өңірдің табиғи тепе-теңдігі мен экожүйесіне елеулі зиян келтіреді. Алдын ала есеп бойынша келтірілген шығын көлемі бір миллион теңгеден асады. Мамандар уылдырық шашу кезеңінде балық аулауға және тасымалдауға қатаң шектеулер енгізілетінін атап өтті.
Бұл шаралар су биоресурстарын сақтау және олардың табиғи көбеюін қамтамасыз етуге бағытталған. Аталған талаптарды сақтамау экожүйенің тұрақтылығына тікелей қауіп төндіреді.
– Қолданыстағы шектеулер мен түсіндіру жұмыстарына қарамастан, жекелеген азаматтар табиғатты қорғау заңнамасын бұзуды жалғастыруда. Мұндай деректер ерекше бақылауда, себебі бұл табиғи ресурстарды сақтау және болашақ ұрпақ игілігіне қатысты маңызды мәселе, – делінген полицияның баспасөз қызметі хабарламасында.
Аталған дерек бойынша қажетті материалдар жинақталып, процессуалдық шешім қабылдау үшін сотқа жолданды. Құзырлы органдардың бұл бағыттағы жұмысы жалғасуда.
