Кәсіпкерлер көкжиегі кеңейеді

Уақыты: 11.04.2018
Оқылды: 1221
Бөлім: КҮЛТӨБЕ

«Атамекен» ұлттық кәсіпкерлер палатасының төралқа төрағасы Тимур Құлыбаев өңірлерге іссапарын жалғастыруда. Жетісу жеріне ат басын бұрып, бірнеше нысанды аралап, сондай-ақ, облыстық кәсіпкерлер палатасы өңірлік кеңесінің  кеңейтілген отырысын өткізіп, облыс бойынша бизнес саласында атқарылып жатқан жұмыстармен танысты. Жергілікті кәсіпкерлерге қызмет көрсету орталығына да барып, жұмысына оң баға берді. Әрі аталған орталықты құруда облыс әкімдігінің қосқан үлесін ерекше атап өтті. Сонымен қатар, отырыста бизнес үшін мемлекеттік қызметтерді оңтайландыру және оларды ұсыну мерзімін қысқарту шаралары жайында сөз қозғады.

Палата басшысының айтуынша, «Атамекен» ұлттық кәсіпкерлер палатасына 5 жылда  22 мыңнан астам өтініш түсіп, оның 40%-ы кәсіпкерлердің пайдасына шешілген. Осы арқылы бизнес өкілдерінің жалпы құны 92 млрд. теңгені құрайтын құқығы мен мүддесі қорғалған. Сондай-ақ, 20 мыңнан астам нормативтік-құқықтық актілердің жобасы сараптамадан өткізілген. Ал палата ұсынған ескерту мен ұсыныстың 73%-ы мемлекеттік орган қызметінде ескеріліпті. Ең бастысы, палатаның қатысуымен жаңа Салық кодексі әзірленіп, шағын және орта бизнес өкілдері үшін арнайы салық режимі мен қосылған құн салығының мөлшері сақталып, әкімшілендіру жеңілдетілді. Ұлттық палата тарапынан атқарылған осындай игілікті жұмыстар өңірдегі кәсіпкерлердің жұмысына жан бітірді. Әсіресе, бизнес пен жергілікті билік арасындағы ынтымақтастықты бекемдей түсті. Тимур Асқарұлы осы бағытта облыс әкімдігінің өңірлік кәсіпкерлер палатасын қолдап, өнімді жұмыс атқарып жатқанын  ерекше атап өтті.
Осыдан кейін облыс әкімі Амандық Баталов өңірдегі бизнесті қолдау бағытында атқарылған жұмыстар  жайлы жан-жақты айтып өтті. Өткен жылы облыс әкімдігінің қолдауымен жаппай кәсіпкерлікті дамытуға 9,3 млрд.теңге бөлініп, 1052 кәсіпкерге мемлекеттік қолдау көрсетіліп, 2500 жұмыс орны құрылған.  «Бизнестің жол картасы – 2020» бағдарламасы шеңберінде 3,6 млрд. теңге бөлініп, 210 кәсіпкерге қолдау көрсетілген. Бизнесті қолдау мақсатында шағын несие беру, қаржылай емес қолдау көрсету, тағы басқа бағдарламалардың орындалуына да көп көмек көрсетілді. Бұл өз кезегінде облыстық бюджеттің де қоржынын қампита түсті. 
Отырыста облыстық кәсіпкерлік палатасының да атқарған жұмысы сараланды. Бұл туралы өңірлік палата директоры Нариман Әбілшайықов баяндады. 
Оның есебінше, өткен жылы кәсіпкерлердің құқығын қорғау бойынша облыстық палатаға 233 өтініш тіркеліп, олардың 80 пайызы кәсіпкерлердің пайдасына шешіліпті. Сондай-ақ, республикалық және жергілікті 40 әкімшілік кедергі анықталып, 13-і алынып тасталған. Агроөнеркәсіптік кешенді дамыту бойынша 42 тегін семинар өткізіліп, 1338 жетекші және жұмысшы біліктілігін арттырса, 145 ауылшаруашылығы кооперативі құрылып, 28-і қаржыландырылған. Кәсіпкерлікті қаржылай емес қолдау бойынша құны 5 млрд. теңге болатын 432 бизнес-жоспар әзірленіп, оның ішінде 68 жоба 217,1 млн. теңге көлемінде қаржыландырылыпты. Сонымен қатар, 8 мың кәсіпкерге 6437 сервистік қызмет көрсетіліп, кеңес берілген. «Бастау бизнес» аясында 285 қатысушы 1 млрд. теңгеден астам несие алыпты. Отандық тауар өндірушілерді қолдау аясында 1,4 млрд. теңгелік келісімшарт жасауға қолдау көрсетіліпті. Адами капиталды дамыту бағыты бойынша  атқарылған жұмыстар да көңіл қуантады. Былтыр кәсіпкерлікті дамыту мақсатымен 23 инвестициялық жоба ұсынылып, нәтижесінде 450 млн. теңге болатын 2 жоба қаржыландырылған. 
Жиында Панфилов ауданындағы «Ернар» шаруа қожалығының басшысы Тасқын Жапарқұлов жүгері дақылын субсидиялау мәселесінің шешілмей келе жатқанын алға тартса, «Сарғалдақов» шаруа қожалығының төрағасы Жанатбек Сарғалдақов Ұлттық палата өкілдерінен алма бағын субсидиялауды кеңейтуді өтінді. Ал Текелі тау-кен комбинатының директоры Бақыт Шалбаев Текелі қаласынан комбинатқа дейін газ желісін тарту ісіне кәсіпкерлердің көмектесуін сұрады. Көпшіліктен түскен ұсыныстарға «Атамекен» ұлттық кәсіпкерлер палатасы басқармасының тө-рағасы Абылай Мырзахметов жауап берді. 
Отырыстан кейін журналистердің сұрағына жауап берген «Атамекен» ұлттық кәсіпкерлер палатасы төралқа төрағасының ресми өкілі Жігер Әзбергеннен білгеніміздей, осы күнге дейін «Атамекен» ұлттық кәсіпкерлер палатасында арнайы мәселелердің тізімі құрылған. Оған енгізілген ұсыныстардың 68%-ы шешімін тауыпты. Демек, осы жолы айтылған ұсыныстар да оң шешімін табады деген ойдамыз.

Қажет АНДАС