Алматы облысының қоғамдық-саяси, әлеуметтік-экономикалық газеті

КЕРІ КЕТКЕН КЕЗЕК: ТАЛДЫҚОРҒАНДА ТҮКШ-КЕ (ЖКХ) ҚАТЫСТЫ ДАУ ШЫҚТЫ

Уақыты: 03.05.2021
Оқылды: 447
Бөлім: ӘЛЕУМЕТ

Талдықорғанда 10 жылдан бері үй кезегінде тұрған 5 мыңнан астам адам тізімнен шығып қалды. Ал кей тұрғындардың кезектері кері жылжып жатыр. Бұл туралы "Жетісу" газеті "Қазақпаратқа" сілтеме жасап мәлімдеді.

Мәселен, Бақыт Жамалова мүгедек баласын асырап отырғанын айтады. Ол 12 жыл бұрын үй кезегіне тұрған. Жылда-жылда кезектері ел қатарлы жылжып жатқан. Бірақ аяқасты кезектен мүлдем алып тастапты. Шарасыз қалған ана мүгедек балам жазылып кеткен жоқ, құқығымды таптап жатыр деп күйініп тұр.

- Мен үй кезегінде 315-нші болып тұрғанмын. Қазір 150-ші болу керекпін. Сызып тастаған. Себебін ешкім түсіндірмейді. Мен талап етемін, кезегімді қалпына келтірсін, - дейді ол.

Ал тағы бір тұрғын кезегінің кері жылжып кеткеніне ашулы. «Келіп тексертсем, мені 5560-қа лақтырып тастапты. Кері жылжытқан. Мен аптасына үш рет диалезге барамын. Жанымдағы адамдар шетінен көз жұмып жатыр. Денсаулығыма байланысты мен бес мың бәленбайыншы кезекті күте алмаймын, өліп қаламын. Талабым кезекті қалпына келтірсін», - деді бірінші топтағы мүгедек Раушан Тұрсынова.

Халықты шулатып жатқан тұрғын үй-коммуналдық шаруашылық бөліміндегілер 5 мыңнан астам адам үй кезегінен сызылып тасталды деді. Себептері әртүрлі. Бірінің басында үйі бар, бірінің мекенжайы ауысқан. Ал кезектері алдыға емес, керісінше артқа жылжып кеткендер заңсыз үй кезегінде тұрғандар деп түсіндірді.

- Осы категориялар заңсыз болып келген. Бұл жерде тұрғындарды кінәлап тұрған жоқпыз. Бұл кісілерге дұрыс ақпараттандыру жүргізіп жатырмыз. Бұл кезектердің барлығы 2004 жылдан бастап жүріп келген. Барлығына осы азаматтарға қолдарына справка беріліп келген. Сіз 20-шы тұрсыз деп, сіз 1000-ншы тұрсыз деп, - деді Талдықорған қалалық ТҮКШ бөлімінің сектор меңгерушісі Данияр Оразов.

Данияр Оразовтың сөзінше, бұған дейін тұрғындарды 19 санат бойынша үй кезегіне қойып келген. Енді электорнды базаға енгізу үшін санаттар біріктіліп, 6 санат қана қалған. Сол себепті тұрғындардың кезегі алдыға емес, керісінше, артқа жылжып кеткен. Ал бірі кезектен мүлдем сызылып, бірінің кезегі артқа жылжып жатқан тұрғындар барлық былыққа әкімдіктегілердің өздері кәнәлі дейді. Заңды түрде кезекке тұрдық, енді барлығын қалпына келтірсін, ойларына келгенді істеуге жол бермейміз деп ашулы. Шырылдап қалған жандар үй кезегіне дұрыс қоймаған әкімдіктегілер жауапқа тартылсын деп талап қойды.

"ЖЕТІСУ-АҚПАРАТ"