Оқи отырыңыз
ҚР Премьер-Министрі Әлихан Смайыловтың төрағалығымен Үкімет отырысы өтті. Келелі жиында алдымен Қарағанды облысында орын алған балалардың жаппай улану жағдайы күн тәртібінен тыс қаралды. Бұл жайлы Денсаулық сақтау министрі Ажар Ғиният баяндап, бүгінде аталған мәселе бойынша қолға алынып жатқан шараларға тоқталды.
Денсаулық сақтау министрінің айтуынша, Қарағанды облысындағы арнаулы әлеуметтік қызмет көрсету орталығына түскен 14 баланың бүгінде 6-уы ауруханада, олардың барлығы жансақтау бөлімінде жатыр. Төртеуінің жағдайы ауыр халде. Қалған 2 баланың жағдайы неврологиялық тапшылық, интоксикация синдромы және тыныс алу жеткіліксіздігіне байланысты өте ауыр. Бұған дейін 7 бала қанағаттанарлық жағдайда шығарылған, бүгінде олар дәрігерлердің бақылауында.
Аталмыш оқиғаға байланысты министрлік шұғыл түрде республикалық жетекші балалар мамандарын жұмылдырып, интенсивті терапия көрсеткен. Қазіргі таңда санитарлықэпидемиологиялық бақылау комитеті эпидемияға қарсы іс-шаралар мен тексеру жұмыстарын жалғастырып жатыр. Бұл орайда Премьер-Министр балаларды барлық қажетті дәрігерлік көмекпен қамтамасыз етіп, ауруханадан шыққаннан кейін де олардың жағдайын ерекше бақылауда ұстауды тапсырды. Ішкі істер министрлігі болған оқиғаның нақты себептері мен кінәлілерді анықтау бойынша тергеу амалдарын мұқият жүргізуі тиіс екенін қадап айтты.
Өз кезегінде күн тәртібіндегі 3 мәселе қаралды. Олар – алдағы су тасқыны кезеңінде елді мекендерді қорғауды қамтамасыз ету жөніндегі шаралар, көші-қон саясатының 2023-2027 жылдарға арналған тұжырымдамасын іске асыру барысы, ҚР Үкіметі қаулыларының жобалары жайлы мәселелері.
Жиында көтерілген су тасқынына байланысты мәселе бойынша Төтенше жағдайлар министрі Сырым Шәріпханов, гидротехникалық құрылыстарды жөндеу туралы Экология және табиғи ресурстар министрі Зүлфия Сүлейменова, Индустрия және инфрақұрылымдық даму министрі Марат Қарабаев баяндаса, өңірлерде жүзеге асырылып жатқан шаралар туралы Түркістан облысының әкімі Дархан Сатыбалды, Ақтөбе облысының әкімі Ералы Тоғжанов және Батыс Қазақстан облысы әкімінің орынбасары Тілепберген Каюпов баяндама жасады. Бұл тұрғыда Әлихан Смайылов биылғы көктем оңай болмағанын айтып, алдағы мезгілге дейін қапысыз қамдану керектігін атап өтті. Су тасқыны қателікті кешірмейтінін, қыс түскенше қызу жұмыс сапалы тиянақталуын ескертті.
Сонымен қатар, Әлихан Смайылов көші-қон саясатының 2023-2027 жылдарға арналған тұжырымдамасын іске асыру барысы, ҚР Үкіметі қаулыларының жобалары мәселелері бойынша да жауапты министрлердің баяндамасын, өңір басшыларының уәжін тыңдады. Оған қоса күн тәртібіндегі мәселелер бойынша министрліктер мен облыс басшыларына тапсырма жүктеді.
Сурет: primeminister.kz-тен көрнекілікке алынды
Асыл СҰЛТАНҒАЗЫ
