Оқи отырыңыз
Осы уақытқа дейін шекараны қорғауға неміс, шығыс еуропалық және бельгиялық иттер тұрған. Әлемдік тәжірибеде бұл иттер тез қолға үйретіліп, күрделі тапсырмаларды өте жақсы орындайтыны белгілі. Алматы облысындағы қызметтік кинология басқармасының базасында енді қазақ иттерінің тұқымдары болады.
“Мамыр айынан бастап "Жеті қазына" қауымдастығынан алынған екі төбет күшігінің қабілеттерін тексеруге тест өткізудеміз. Екеуі де жақсы жағынан байқалды. Есту қабілеттері өте дамыған және олар адамға өте тез бейімделеді. Жыл соңына қарай осы екі күшікті сынау негізінде қорытынды жасап, оларды қандай қызмет үшін пайдаланатынымызды анықтаймыз, – дейді басқарма бастығы капитан Әлімжан Құлмағанбетов.
Сарапшылар тазылар шекара күзетінде жылқылармен бірге қолданса болады деп санайды. Өйткені олар атпен аң аулауға бейім. Өткір иіс сезу қабілетінің арқасында тазы есірткі мен жарылғыш заттарды іздеуге де жарайды.
“Күшіктерді сынау кезінде олардың жылдам екенін байқадық. Мінезі жұмсақ, икемді. Сондықтан оларды іздеу және бақылау қызметтері үшін пайдалану керек деп санаймыз. Иіс сезуінің арқасында ол құқық бұзушыны оңай таба алады, ал жылдамдығымен қашып бара жатқан қылмыскерді тез ұстайды, — дейді бөлім бастығы Бауыржан Зақын.
