Оқи отырыңыз
Қазақстан Республикасы Президенті әкімшілігі және аудандық мәслихаттың келісімімен Алматы облысы әкімі Амандық Баталовтың өкімімен Серікжан Ерекешев Талғар ауданының әкімі болып тағайындалды.
Талғар ауданының тізгінін алғанына жылға жуықтаған Жолан Омаровты еске алудан сөз бастаған облыс әкімінің бірінші орынбасары Ләззат Тұрлашев есімі ел аузында жатталған Жолан Ыбырайақынұлының басқару ісіндегі батылдығы мен тиянақтылығы, тәжірибесі мен адамгершілігінің мол, арман-мақсаттарының биік болғандығын тілге тиек етіп, марқұмның артында қалған ұрпақтарына амандық тіледі.
Жаңа әкім Серікжан Казиұлы еңбек жолын 1997 жылы Алматы қаласында «Бағалы қағазды тіркеу системасы» жабық акционерлік қоғамының тізімдерді жүргізу қызметінің жетекші маманы ретінде бастаған ол көп жылдар бойы Маңғыстау облысында еңбек еткен. Ал 2012 жылдан 2016 жылға дейін іргелі Іле ауданының Байсерке ауылдық округінің әкімі болып қызмет еткен С.Ерекешев одан бергі уақыт аралығында аталған аудан әкімінің орынбасары лауазымын атқарған.
Әкімшілік басқару ісінде іс-тәжірибесі толысқан Серікжан Ерекешевті облыс әкімінің бірінші орынбасары Лаззат Тұрлашев таныстырып, орынтағына отырғызды.
- Үстіміздегі жылдың жеті айында ауданда әлеуметтік-экономикалық дамудың барлық бағыттары бойынша оң серпін сақталды. Барлық салада өсім бары байқалады, – деді тағайындауда сөз бастаған облыс әкімінің бірінші орынбасары Лаззат Махатұлы. – Ауылшаруашылығы өнімінің жалпы көлемі 15,4 млрд.теңге, ал өнеркәсіп өнімінің көлемі 27,3 млрд.теңгені құраған. Аудан бойынша құрылыс жұмыстарының көлемі өткен жылмен салыстырғанда 17,4 пайызға артқан, сондай-ақ, 36,9 млрд.теңге инвестиция тартылып, өткен жылдың осы кезеңімен салыстырғанда көлемі 25,4 пайызға артқан, – деген Л.Тұрлашев Талғар ауданында бірқатар проблемалардың да барын көлденең тартты.
Атап айтсақ, 622,6 шақырым сумен жабдықтау желілерінің 55 пайызы жөндеуді қажет етеді. Ирригацияық желілердің 70 пайызы тозған. Баспана алу кезегіне 5 мыңнан аса адам тіркелсе, 30 мыңға жуығы жер алу кезегінде тұрғандығы айтылды. Аудандағы үш ауысымды 2 мектептің мәселесін шешу де бүгіннің міндеті. Қайнар, Нұра, Бесқайнар ауылдық округтерінде интернет жылдамдығының төмендігі де ел алаңдатқан проблема екендігі тарқатылды.
Тарихы терең Талғар ауданының әлеуметтік-экономикалық дамуына білім-білігін, ерік-жігерін жұмылдыруға тиіс жаңа әкімге облыс әкімінің бірінші орынбасары Лаззат Тұрлашев бірқатар тапсырма жүктеді. Олардың көшбасында коронавирус салдарынан төмендеген экономиканы қалпына келтіру жұмыстарын іске асыру, санитарлық-эпидемиологиялық талаптарды сақтай отырып, шағын және орта бизнес нысандары жұмысын қайта іске қосу, сонымен бірге, «Жұмыспен қамтудың жол картасы» бағдарламасы бойынша іске асырылып жатқан инфрақұрылымдық жобалар аясында жаңа жұмыс орындарын құруды тапсырды.
Тұрғындардың арасында коронавирустық инфекцияның таралуына жол бермеу шараларын күшейту, қашықтан оқыту режиміне байланысты елді мекендердегі интернет желісінің жұмысын жақсартуды, мұқтаж отбасылары балаларын компьютерлік техникамен қамтамасыз етуді, жерге қатысты қордаланған мәселелерді бақылауға алып, заң шеңберінде шешуді және дәнді-дақылдарды жинауды уақытында әрі сапалы жүргізуді тапсырды.
Арнайы тағайындаудан соң атқамінер азаматтар Талғар қаласының «Бозторғай» мөлтекауданына барып, ондағы блокты-модульді қазандықтардың құрылысымен және көпқабатты үйлердің алаңдарын абаттандыру жұмыстарымен танысты.
- Орталықтандырылған жылыту қазандықтарының рақатын көрдік. Қыс бойы отын-судың проблемасын ұмыттық. Бұл – бір. Екіншіден, немерелеріміздің осындай әдемі де сәнді етіп салынған алаңқайда ойнап жүргеніне қуаныштымыз. Жолан балам арамызға сан мәрте кеп, амандық-саулығымзды, кем-кетігімізді біліп тұрушы еді. Елі үшін жаралған жан еді, амал не? Енді жаңа әкіміміз Жолан бастаған жарқын істерді жалғастырар деп үміттенеміз, – деген зейнеткер Әбдікәрімова Наушарбан апа ақ батасын берді.
- 2018 жылдан бері облыс әкімінің тапсырмасымен блокты-модульді қазандықтар қойылып, оның артынша абаттандыру жұмыстарын жүргізу тапсырылған болатын. Бұл жұмыстар Қарасай, Еңбекшіқазақ, міне, Талғар ауданында қарқын алып келеді. Сол себепті, барлық жобалар сапалы әрі тиянақты түрде белгіленген мерзімде аяқталуы тиіс, – деді Л.Тұрлашев.
Ұлбосын ИСАБЕК
Талғар ауданы
Алматы облысы
