Оқи отырыңыз
Қазақстан Республикасы Конституциясы күні қарсаңында Достық үйінің мәжіліс залында салтанатты шара өтті. Жиынға облысымыздағы этномәдени орталықтардың директорлары мен БАҚ саласының қызметкерлері қатысты.
Санитарлық талаптарды сақтай отырып өткізілген салтанатты жиынды Қазақстан халқы Ассамблеясының Алматы облысы бойынша өкілдігі төрағасының орынбасары Ғабит Тұрсынбай жүргізіп, жиынға қатысушыларды айтулы мерекемен құттықтады.
Биыл Қазақ елінде ұлы Абайдың 175 жылдығы, Жеңістің 75 жылдығы, сонымен қатар, Қазақстан халқы Ассамблеясының 25 жылдығы сияқты бірнеше маңызды мерейтойлар аталып өтуде. Осындай мерейлі мерекелер жайлы айтып өткен ол Қазақстан халқы Ассамблеясы Алматы облысы бойынша өкілдігінің жыл бойына істеген жұмыстарына кеңінен тоқталды.
Бүгінде еліміз өте күрделі кезеңді бастан өткеріп отыр. Әлемді жаулаған індет қай салаға болсын кесірін тигізіп, елдің алаңдаушылығын тудырды. Дәл осындай қиын-қыстау кезеңде Ассамблея мүшелері де қарап қалған жоқ. Күтпеген қиыншылықты жұртшылықпен бірге өткеріп, індетке қарсы тұра білді.
Ел бірлігін сақтауға күш салған этномәдени бірлестіктердің төрағалары Аналар, Қоғамдық келісім кеңестері, «Жаңғыру жолы» республикалық жастар қозғалысы өңірлік штабының мүшелерімен бірлесіп Арыс қаласындағы жарылыс пен Мақтаарал ауданындағы су тасқынының, Қордай ауданының Масанчи, Сортөбе ауылдарындағы келеңсіз оқиғалардың салдарын жоюда белсенділік пен ауызбірлік танытып, көмекке зәру жандардың қасынан табылды. Одан бөлек, індетке қарсы тұру мақсатында «Еріктілер орталығы» құрылып, қайырымдылық бағытта іс-шаралар ұйымдастырды. Қайырымдылық күніне орай 160-тан астам шара ұйымдастырылып, екі жүзге жуық аз қамтылған отбасы мен көпбалалы отбасыларға көмек қолын созды.
Қазақстан халқы Ассамблеясының Алматы облысы бойынша өкілдігі төрағасының орынбасары Ғабит Тұрсынбай осындай игілікті істер жайында кеңінен айта келіп, елді бірлік пен берекеге шақырды. Елді алаңдатқан індет жойылып, алдағы күндерімізде төрт көзіміз аман, бауырымыз бүтін болсын, бірлік пен ынтымақты нығайтуға бағытталған жемісті істерді атқара берейік деген ақ тілегін ақтарды.
Бұдан кейінгі кезекте марапаттау шарасы өтті. Қазақстан халқы Ассамблеясының 25 жылдығына арналған мерекелік медальмен этномәдени бірлестіктердің жетекшілері марапатталды. Мұндай марапатқа БАҚ өкілдері де ие болып, қуанышқа бөленді.
Олардың арасында «Өлке тынысы» ЖШС директоры Мейрам Жанәділов пен облыстық «Жетісу» газетінің бас редакторы Әміре Әрін, осы газеттің фототілшісі Жұмабай Мұсабеков, облыстық «Жетісу» телеарнасының тілшісі Надежда Беловалар бар.
Салтанатты шарада облыстық «Жетісу» газетінің бас редакторы Әміре Әрін құттықтау сөз сөйлеп, қуаныш иелерін марапатымен және Қазақстан халқы Ассамблеясының 25 жылдығы мерекесімен құттықтады.
Ришад ТҰРҒАНБАЕВ
Алматы облысы
