Алатаудың бөктерінен бүгін ызғырық жел есіп тұр. Алматының аспанын әдеттегідей қалың бұлт торлаған. Әлмисақтан қазақ халқы бұл айды тектен-текке желтоқсан атамаса керек. Тұтас Алаш даласында қыс қаһарын сездіріп, ақ түтек боран әлсін-әлі ұйытқып соғады. Ақ көрпеге көмкерілген алыстағы ауылдар төрт түлігін түгендеп, мемлекет белгілеген жоспарды межесінен асыра орындап әлек. Қарасақ, қазаққа қой бағуда ғана шектеу қойылмапты. Қалған қай істе болмасын әр аттағаны – аңду, әр басқаны – бұғау. Тіпті, қалалы жерде қазақша тіл қатқандардың әр қадамына қылбұрау салынған. Түркілердің дәуірінде Тұран даласын әлдилеген Алаштың тілі Алматыда аяққа тапталып жатты. Іле аңғарындағы көне қаланы қамал жасап, көшпенділерден қорғанған отаршылдар ақыры қазақ тарихына балта шапты. Ұраншыл еңбекшілерді жасақтаған оспадар билік қаладағы қапас пәтерді паналап жүрген қазақтарға кешегі көшпелі өмірін ұмыттырғысы келді.
Оқығандарын оққа тосып, бас көтергендерін бостандықтан айырған жарлылардың билігі расында атқа қонған Алаш заманынан қатты сескенетін. Сол себепті де әу баста халықтың жылқыларын жусатып салып, етін жапа-тармағай Ресейге жөнелтті. Орталықтандырамыз деп тұрандықтарды төрт түлігінен айырып тастады. Жоқ, ежелден еркіндікте өскен бұла халық мұндай жаныштаудың түбі жақсылыққа апармайтынын жақсы білді. Еңсесі езілсе де кеудеде жаңа ұшқын, жаңа от тұтанып келе жатты. Әсіресе, тарихқа бетбұрыс жасаған жазушылардың теңдессіз шығармалары жастардың жігерін ұштап қана қоймай, қанында бар қайсар мінезді қайта тірілтті. Бір ғана Ілияс Есенберлиннің «Қаһарын» оқып, хан Кененің ұлт жолындағы қиян-кескі күресін ой елегінен өткізген мыңдаған қазақ рухани серпіліс жасады. Қалам ұстағандар өткеніне ұмтылып, тарих арқылы Алаштың әбден қалжыраған, әлсіреген, титықтаған өзегіне су құйды. Балта шабылған тамырын ерлік пен өрлікке толы тарихымен жалғады.
Желтоқсанның желі далада үскірікке ұласып, малшылардың беті-қолын әбден домбықтырып жіберіпті. Ал қалада жанға жайсыз тиетін ызғырық толастамай, тұрғындардың тұла бойын қалтыратып қояды. Сейсенбінің таңында кешегі суық жел әлі басылмапты. Бүгін ортақшыл мемлекеттің кіндік қаласында кезектен тыс кеңес өтті. Анығында, шұғыл ауыс-түйіс. Бұл жолы да терістіктегі шешім асығыс және үстірт шыққан. Қазақтың тағдыры қайбір асықпай, ақылмен шешіледі дейсіз?! Әдеттегіден де қысқа жиын. Миллиондаған халықтың, байырдан қалыптасқан тарихи отаны бар елдің басшысы небәрі он сегіз минутта тағайындалды. Ресейдің қиыр шетіндегі облыс басшысын кешегі хан Абылайдың халқына жетекшілік жасатып қойды. Құлақ естіп, көз үйренген, қалың қазақтың көз алдында жүрген көсем болса бір сәрі ғой.
Олай емес екен. Ұраншыл, әкімшіл, әміршіл орталық қазақты тарихынан түпкілікті ажыраттық, өткенін мәңгілікке ұмыттырдық деп тым ерте ойлап, тым ерте өрескел шешім шығарыпты. Қойдың санын елу миллиондық межеге жеткіземін деп жанталасқан халыққа жергілікті басшының қажеті шамалы шығар. Ауылдағы бірен-саран адамдар болмаса, Алматыдай астанада ұлттық тұрғыда пікір айтатын ешкім жоқтығы бесенеден белгілі. Айтпаса да түсінікті. Өйткені, миллоннан аса тұрғыны бар Алматыда бір ғана қазақша оқытатын білім ордасы қалған. Оның өзі санаулы жылда жабылады. Жоғары білім беру үшін де бірнеше сатылы кедергілер саяси түрде реттеліп қойған. Алдымен ерлері қару асынып, шекара асып екі жылын әскерге сарп етеді. Содан кейін тағы екі жыл малдың соңында шопан болады. Сонымен өзі де қара жұмысқа жегіліп, оқуға деген талпынысын күнделікті күйкі тіршілік күйретеді. Айтқанға еретін еңбек адамына айналады. Мұндай адам мемлекетке өте-мөте қажет әрі бөтен ойы жоқ, қауіпсіз.
Әшейінде елді еңбекке жұмылдырып, материалистік өмірде ешбір қателікке бой алдырмайтын жарлылардың рухани жарымжан билігі дәл осы жолы оңбай қателесті. Олар қазақтың намысын, қазақтың қанша жаныштаса да, үп еткен желге қайта тұтанатын қайсар мінезі мен ерен ерлігін ескермей қалды. Сейсенбіден сәрсенбіге қараған түні Алматыдағы Алаш ұрпақтары жасырын жатақхана аралап, жастар тегіс атқа қонды. Бәрінің басын ұлттық намыс, жаншылған жігер, өгейден көрген қысым, бөтеннен тартқан теперіш, қитұрқылардан сезген қағажу бір тудың астына біріктірді. Бірінің аузына бірі түкіріп қойғандай, жәудіркөз жастар бәрін үнсіз ұғынысты. Таң алакеуімде Алматы жастары алаңға ағылды.
Кремль алаңдағы қалың қазақ жастарын көріп, әбден әбігерге түсті. Мына кешегі көшпенділер әлі асау мінезінен айнымапты. Осыған дейінгі орыстандыру саясаты қайда қалды? Рухсыз, тілсіз, дінсіз идеология жүргізіліп, бәрі қой соңына түскен еңбекші болып кеткені қайда? Бұлар сонда намысын әлі ұмытпаған ба? Ұлттық намыс дейді? Сондай сипат болуы мүмкін бе? Жасырын жиында ортақшыл биліктің көсемдері осы сауалдарға жауап іздеді. Тәуелсіздікке ұмтылған жастар туған тарихындағы сан мың бұлқыныспен қайта қауышты. Сасқан орталық әскери күш жұмылдырмас бұрын баяғы жымысқы идеологиясының бір ұшығын пайдаланып көруді жөн санады. Олар қазақтың беткеұстар адамдарын, танымал тұлғаларын алаңдағы жастарға басу айтуға міндеттеді.
Нәтиже шықпады. Расында да, қазақ студенттері қайсар екен. Екі жыл қой бақтырып, төрт түлікке салып, ауыр еңбекке жексе де, білімге деген құштарлығын ешкім жоя алмады. Көрдің бе, бұлар сол асулардың бәрінен өтіп, жоғары білім алып, ұлттық намыстың не екенін, жаныштаудың қандай болатынын, теріс идеологияның қалай іске асатынын түсініп қойыпты. Сексеуілді сексеуілге ұрып сындыру саясаты аяқсыз қалды. Алаң айналдырған бір сағаттың ішінде толып кетті.
Бұл не сұмдық? Кремль шын састы осы жолы. Басқа басқа, дәл осы қазақтарда ұлтсыздандыру саясаты тыңғылықты жүріп еді ғой. Ә, мұның айласы енді табылды. Әлгі Геннадий Колбинді қайта тақтан тайдыру марксистік мемлекетте өте ұят. Сондықтан, бұлардың сазайын жалған ақпаратпен, негізсіз жаламен беру керек. Биліктің басы қатты. Ашуға булыққан жастар мынадай Лениннің мемлекетіне үлкен талап қояды деп кім ойлаған? Бірінші хатшыны негізсіз тағайындады деп шектелсе бір жөн. Жастар Қазақстанда туып-өскен адамды басшылыққа қоюды сұрайды. Сұмдық-ай! Мұндай оқиға сонау қазан төңкерісінен бері болмап еді. Сол кезде-ақ қазақтың осындай бас көтерерлері қыршынынан қиылып, жоспармен күн кешетін рухсыз, тарихсыз, тілсіз қоғам құрылған сияқты болатын. Мынау қайдан шықты тағы? Бұлар шеттерінен нашақор, араққа салынған, бұзақы, ауылдан, қаладан, жан-жақтан жиналған маскүнемдер ғой. Иә, солай. Қарасаңшы, әне, түрлері сұсты. Айқайлағанына қарағанда ішімдікке сылқия тойған сияқты.
Жоқ, бұл жоспардың да аяғы аспаннан келді. Алаңды ғасырларға жалғасқан азаттық рухы кернеп тұрған еді. Бірақ орталықтың жандайшаптары мұны ескермеді тағы. Әскери күш қолдануға көшті. Мамандандырылған алып денелі жендеттер Алаш ұрпақтарын аяусыз соққыға жықты. Жастар тайсалған жоқ. Өйткені, олардың соңында қағажу көрген қалың елі, бабалар аманаты тұр еді. Орталық ұлттық намыстың алаулап жанған отын суық сумен сөндіруге талпынды. Сол әскери әрекетімен бірге құдайсыз қоғам құрғысы келген материалистер де құрдымға кетіп, қабырғасы сөгілерін білген жоқ. Ғасыр басындағы дербестікке ұмтылған ұлт-азаттық көтеріліс 70 жылдан кейін Желтоқсан болып жалғасты. Бір сөзбен айтқанда, Желтоқсан көтерілісі Қазақстанның тәуелсіздігіне жол ашты.
«Мен алаңға Дінмұхамед Қонаевты да, басқаны да қорғау үшін барған жоқпын. Мен қазақ қыздарын шашын сүйреп, тепкілеп жатыр дегенді естіп бардым», – деп жазады Желтоқсан көтерілісінің қаһарманы Қайрат Рысқұлбеков өзінің берген түсініктемесінде. Қарындасын қызғыштай қорғаған қайран қазақ бостандық жолында не көрмеді?! Қайсар халық тәуелсіздік үшін талай рет тұяқ серпіп, 300-ден астам көтеріліс жасапты. Қанды шайқастарда қаншама боздақ бостандықты сезіне алмай арманда кетті десеңізші?! Бақытты күнің енді туды, Алаш!
...Осыдан отыз жыл бұрын ескен ызғырық қазір жоқ. Аспан шайдай ашық. Алаңда азаттық рухына арналған екі ескерткіш тұр. Бірі – бес қаруы сақадай сай сауытты қазақ сарбазы мүсінделген Тәуелсіздік монументі. Бірі – «Тәуелсіздік таңы» деп аталатын Желтоқсан құрбандарын еске алып, қолына құс қондырып тұрған алтын құрсақты ананың мүсіні. Маңайында азат елдің ұрпақтары ойнақ салып жүр.
Қуаныш Тұнғатар