Оқи отырыңыз
Волейболдан «Жетісу» әйелдер командасының жаттықтырушысы серб маманы Марко Гршич келесі маусымға да қалатын болды. Өткен маусымның ортасында команда тізгінін қолға алған бапкерге жаңа маусымда өзі қалаған ойыншыларымен команданы жасақтап, жеңіске жету үшін басшылық мүмкіндік берді. Оны жаттықтырушы да құп алды.
Өткен маусымның басында команданы жасақтап, жарыс жолына Валерий Шиндов қосқан болатын. Қазақстан кубогындағы және бірінші турдағы сәтсіздіктен кейін бапкерлік қызметтен кетіп, орнына елімізге белгілі, «Алтай» клубымен барлық титулды бірнеше рет жеңген жаттықтырушы Марко Грчиш тағайындалған еді. Марконың бапкерлігімен «Жетісу» өткен маусымды 4-орынмен аяқтады. Түркістанда өткен плей-офф кезеңінің жартылай финалында «Берелден» үш күннің қорытындысы бойынша 1:2 есебімен жеңілсе, үшінші орын үшін болған ойында «Қуанышпен» де үш күн ойнап 1:2 нәтижесімен ұтылды.
Марко Грчишке «Жетісудан» бөлек шет елдік командалардан да ұсыныс болды. Бапкер бұл жолы да «Жетісуды» таңдап отыр. Қазірден жаңа маусымға волейболшыларды таңдауды бастап кетті.
- Еліміздегі тұңғыш волейбол базасы Талдықорғанда салынып жатыр, жуық арада қолданысқа беріледі. Жалпы жетісуда волейболға деген қолдау ерекше. Ал жаңа маусымға дайындығымызды шілдеден бастап кетеміз. Маркомен өткен маусымның ортасынан бастап жұмыс істеп, нағыз маман екеніне көзіміз жеткен. Келесі маусымда жетісулықтарды жеңіспен қуантқымыз келеді, - дейді команданың директоры Нияз Жантілеуов.
"ЖЕТІСУ-АҚПАРАТ"
