Оқи отырыңыз
Бүгінгі күні бір баланың өзін мектепке дайындау ата-анаға әжептәуір салмақ түсіретіні анық.
Ал, отбасында бірнеше бала болса ше? Әлбетте, мұндай жағдайда әке-шеше барлық баласын бірдей жаңа оқу жылына сақадай сай етіп даярлай алмасы анық. Бұдан басқа да әлеуметтік көмекті қажет ететін тұрмысы төмен отбасы мен жетім, жартылай жетім жеткіншектер бар. Оларға да көп болып көмек көрсету игілікті іс. Осыған орай жыл сайын еліміз көлемінде «Мектепке жол!» атты республикалық акциясы өткізіліп келеді. 1 тамыз бен 30 қыркүйек аралығын қамтитын акцияға әр облыс, аудан мен қала үн қосуда. Талдықорған қаласында да акцияның салтанатты ашылуы өтті.
№14 орта мектеп-гимназиясында бастау алған шарапатты шараға мұғалімдер, ата-аналар, демеушілер қатысты. Талдықорған қалалық білім бөлімінің басшысы Болат Тұрысбеков көпшілікті акцияның басталуымен құттықтап, бұл мейірімділік пен қайырымдылықты, адамдардың бір-біріне деген риясыз көңілін, болашағымыз балаларға деген шынайы қамқорлықты танытатын ізгі шара екендігін атап өтті.
– Бұл акция көптеген жеткіншекке шапағат нұрын себуде. Өткен жылы қала бойынша 2900 баланы мектепке толық даярлап, ол үшін мемлекет қамқорлығы мен демеушілер тарапынан 25 млн. теңге қаржы жұмсалса, биыл 3200 оқушыны қамту жоспарда бар. Бұл бір реттік қана көмек емес, жыл бойы жалғасып отыратын үрдіс. Осы ретте акция кезінде ғана емес, басқа уақытта да тұрмысы төмен отбасын азық-түлікпен, балаларды қыстық киіммен қамтып, тұрақты демеушілік көрсетіп тұратын азаматтардың бары қуантады, – деді.
Акция аясында оқушылар оқуға қажетті құрал-жабдық, мектеп формасы, спорттық киімдермен қамтылып келеді. Бұл іске облыстық, аудандық әкімдіктен бастап, басқарма, департаменттер, түрлі мекеме, ұйымдар белсенді түрде атсалысып келе жатқанын айта кеткен орынды. Сол сынды ата-аналар, ұстаздар, кәсіпкерлер демеушілік көмек көрсетуде. Сондай жанның бірі «Нұрлы ғасыр» ЖШС-нің директоры Жансая Бейісбекова. Ол биыл он баланы бірдей мектепке даярлауға ниет танытып отыр. Шара барысында да сөз алып, ата-аналарға, балаларға өзінің ақ тілегін арнады. Сондай-ақ, №14 орта мектеп-гимназиясы ата-аналар комитетінің төрайымы Әсел Садықова ізгі лебізін білдіріп, балаларға қуаныш пен күлкі сыйлап отырған барлық демеушіге, осы істің ұйытқысы болып жүрген ұстаздар қауымына алғысын жеткізді.
Аталмыш білім шаңырағында биыл 1217 оқушы білім алатын болса, оның 140-ы тұрмысы төмен отбасының жеткіншегі. Акцияның алғашқы күні бірқатар оқушы мектепке қажетті құрал-жабдықпен қамтылды.
– Акция енді ғана бастау алды. Жаңа оқу жылы басталғанша 140 баланы толықтай мектепке даярлаймыз. Ол үшін әлі де демеушілер іздестіріп жатырмыз. Бүгінгі күнге дейін үлес қосқан жандар да баршылық. Жыл сайын акцияны өз деңгейінде өткізіп келеміз. Балалар үшін бар жақсылығын аямайтын жандар биыл да көптеп табылады деп сенеміз, – деді №14 орта мектеп-гимназиясының директоры Гүлжанар Еспанова.
Акцияға үлес қосамын деген жандар білім шаңырақтарына барып, сондай-ақ, облыс орталығындағы №4 орта мектеп, №19 мектеп-гимназияда орналасқан «Мүшелтой» аула клубы, Еркін, Өтенай ауылдық әкімдігі, Талдықорған қалалық жұмыспен қамту бөлімінен ашылған арнайы пунктке киім-кешек, оқуға қажетті құрал-жабдықтар табыстай алады.
Ал көмек алуға үмітті ата-аналар мен балалар тізімі жергілікті жердегі мектептерде бекітіледі. Баласының болашағына бейжай қарамайтын ата-ана егер мектепке қажетті киім-кешек, құрал-жабдық аламын десе, сонда өтініш білдіруіне болады.
Жыл сайын балаларға мейірім мен шуағын төге келетін акция көпшілік көмегімен өз дәрежесінде өтеріне сеніміміз мол.
Алма ЕСЕНБАЕВА.
