Ел іші – алтын бесік. Осы тәмсіл сөз бүгінгі күні жан-жақтан көш түзеген қандастарымыздың көкейіне берік орныққан. Қазіргі таңда олардың біразы Қытай, Моңғолия, Түркіменстан, Ресей, Қырғызстан және Түркия мемлекеттерінен оралса, біразы Тәжікстан, Иран, Ауғанстан, ТМД елдері мен алыс шетелдерден көшіп келіп, қоныстануда. Өңірімізге оралған қандастарымыздың басым көпшілігі облысымыздың Қарасай, Іле, Еңбекшіқазақ, Жамбыл, Талғар, Ескелді, Көксу, Ақсу, Сарқан аудандары мен Талдықорған қаласының аумағына шоғырланған.
Алайда сол қандастарымыздың «Қара таудың басынан көш келеді, Көшкен сайын бір тайлақ бос келеді», – деп өрілетін тағдыр-талайы сан мәрте талқыға түскені баршамызға мәлім. Сонда да: «Бұл заманда не ғәріп?» деп ел тілегін болашаққа енші етіп, «Еңку, еңку, жер шалған» кездеріміз де аз болмады. Сондай күрестердің нәтижесінде кедей халықты бай етіп, аз халықты көп еттік. Ұлы жеңістердің жемісінен көңіліміздің көтерілген тұсы, қансыраған жеңілістен жігеріміздің мұқалған кезі аз болған жоқ. Басқа жұрттың қанжығасына байланып, алдына өңгеріліп кеткен намысымыз бен қасиетімізді түгендеумен-ақ ғұмыр сүрдік. Қатын-бала қор, қарындасымыз күң болмасын деп жауды көрсе жайнаған, жай тасындай қайнаған батыр-бағландарымыздың күмбір-күмбір кісінетіп күреңді мінген тұсын да көрдік. Сайқал саясаттың теперішінен атажұртын амалсыз тастап, бас сауғалап шетке қашқан шемен тірлікті де бастан өткердік. Айта берсек жүйкені шаршатқан жүйесіз күндер көп болды. Десе де, осыдан 25 жылдың алдында қазақ баласы үшін азаттықтың ақ таңы атып, тәуелсіздік шуағына шомылды. Сонымен қатар, шетте жүрген қандастарымыздың шемен болып қатқан жүрек түкпіріндегі ащы өкініші тарқады.
Міне, содан бергі жиырма бес жылда сағыныштың қауышқан, бауыр-туыстың табысқан, ағайынның арасына алтын арқау жалғағаны жайлы өмірдің бастауы үзілген жоқ. Оның үстіне, қазақ еліне Алланың назары ауып, ауған жүгін дұрыстайтын, көпке қайырымды, халыққа мейірімді Нұрсұлтан Назарбаевтай Елбасын берді. Расында, Кеңес одағының шекпенінен шыққан, онсыз да экономикалық күретамырын Мәскеу буып ұстаған жаңа Қазақстанның алдында түрлі сын-қатер, бас ауыртар ауыр кезеңдер тұрғанда, әлеуметтің тіршілігін нығайтудың дұрыс жолын таба алмай жатқан дағдарысты кезеңде шетелдегі қазақтарды елге шақырып, ысырылып орын беріп, төрін ұсыну екінің-бірінің қолынан келмейтін жұмыс еді. Сол тұста бұл қадамға тек экономикасы орныққан Германия мен санын көбейтіп, салмағын арттыруды көздеген Израиль мемлекеттері ғана бара алған. Тіпті, ТМД елдерінің өзі Қазақстанның бұл қадамына үрке қараған еді. Сол қайырлы істің қуанышын бүгінде миллионға жуық қандасымыз көріп отыр. Бұдан өткен бақыт бар ма?!
Расында, біз туған елдің топырағын басып, жұпар ауасын жұтып, шарапатына шомылып жүргеннен кейін атажұртымыздың асыл қасиеттеріне терең бойлай алмайтынымыз анық. Алайда, шетте жүрген қаракөз қандастарымыздың атажұртқа деген сағынышы, көңіл бұлқынысын, ішкі әлеміндегі толқынысын айтып жеткізу қиын. Елбасы бір сөзінде: «Қазақтың жалғыз Отаны бар. Ол – Қазақстан», – деген еді. Расында, «Өзге жұртта сұлтан болғысы келмей, өз жұртының ұлтаны болу үшін» жалғыз Отанына ағылған көштің саналуан үміті мен тілегі болды. Қазірге дейін шетелден оралған миллионға жуық қандасымыздың бірі атажұртқа асыл сағынышын арқалап жетсе, енді бірі ата-бабасының өсиетін орындап, ыстық сүйіспеншілігін ала келді, өнер мен білім қуып, Қазақ еліне кірпіш болып қалансам деп келген жастардың дені әр салада өнімді еңбек етіп жүр. Ал кәсіптен нәсіп тауып, берекесін қос білегінің қарымынан іздегендер қаншама?! Олар да қарымы жеткенше осы елдің болашағына үлес қосып, азаматтық міндетін абыройлы атқарумен әбігер. Кезінде саясаттанушы Әзімбай Ғали мырза бір сұхбатында: «1962 жылы Қытайдан келген көш Шығыс өңірлердің орыстануын баяулатты. Қазақша мектептер ашылып, халық ана тілінде сөйлейтін болды», – деген еді. Бұл жағдай дәл Тәуелсіздік кезінде де қайталанғаны анық. Демек, «елге ел қосылса құт болатынын» осыдан-ақ терең сезініп жүрміз.
Айта кетерлігі, бүгінде шетте жүрген бес миллионға жуық қандасымыздың ең үлкен алаңдаушылығы – ұрпақтарының болашағы. Несін жасырайық, олар қазақтықтан алыстап барады. Қазақ тілінде білім беретін мекемелер жабылып, балалары өзге ұлт тілінде оқып, өзге ұлт өкілдерімен үйленіп, ұлттық салт-дәстүріне үрке қарайтын деңгейге жетіп отыр. Оларға да туған жердің түтіні ыстық, осы өлкеге жетіп, сағынышын басқысы келеді. Бірақ, түрлі себептер көштің жолын кесіп келеді. Салыстырмалы түрде айтатын болсақ, атажұртқа оралған қандастарымыздың ұрпақтары ұлылықтың бәрін ұлттық мұраттан іздеп жүр. Қазақ елінің қайырлы таңымен күліп оянып, мамыражай кеште алаңсыз ұйқыға кетеді. Демек, бір атаның баласы екі түрлі тағдыр талқысына дөп келіп отыр. Ендігі мақсат, жаны да, қаны да, бары да бір қазақ ұрпағының мұратын ортақ отанында түйістіріп, атажұртта алаңсыз тіршілік етудің жолын қарастыру.
Қажет АНДАС