Қазақстан Республикасы Мемлекеттік қызмет істері министрлігі Алматы облысы бойынша департаментінің басшысы – Әдеп жөніндегі кеңестің төрағасы Серікбай Нұрғисаев жүргізген кезекті отырыста бірнеше мәселе қаралды.
Іле ауданының жолаушылар көлігі және автомобиль жолдары бөлімінің басшысы Е. Нұрқасымов пен тұрғын үй-коммуналдық шаруашылық және тұрғын үй инспекциясы бөлімінің басшысы А. Қамалбекке қатысты тәртіптік істерді қарау Алматы облысы прокуратурасының өтініші негізінде кеңестің кезекті отырысына қалдырылды. Ал Райымбек аудандық мәдениет және тілдерді дамыту бөлімінің басшысы Н. Оқасқа, құрылыс бөлімінің басшысы М. Тілепбердиевке, құрылыс бөлімінің бас маманы Д. Маусымбаевқа қатысты тәртіптік істерді қараған Әдеп жөніндегі кеңестің мүшелері бірауыздан Қазақстан Республикасы мемлекеттік қызметшілері Әдеп кодексінің 5-тармағының 3, 11 тармақшаларын бұзғандары үшін аталған тұлғаларға сөгіс түріндегі тәртіптік жаза қолдануды ұсынды.
ҚР Ұлттық экономика министрлігінен түскен материал бойынша Қазақстан Республикасы Ұлттық экономика министрлігі Табиғи монополияларды реттеу және бәсекелестікті қорғау комитетінің Алматы облысы бойынша департаменті басшысының орынбасары А. Тұрысбаеваға қатысты тәртіптік іс қаралды. «Қазақстан Республикасының мемлекеттік қызметі туралы» Қазақстан Республикасы Заңының 50-бабының 1-тармағының 11-тармақшасын бұзғаны үшін оған қызметке толық сәйкес еместігі туралы ескерту түріндегі тәртіптік жаза қолданылды. Сонымен қатар, Іле ауданының әкіміне қатысты тәртіптік жазаны мерзімінен бұрын алу туралы мәселе Әдеп жөніндегі кеңес ұсынымы бойынша қарастырылды.
Мемлекеттік қызметкерлердің мемлекеттік автокөлік құралдарын қызметтік емес мақсатта пайдалану фактілерін анықтау мен ондай келеңсіздіктің алдын алу мақсатында облыс бойынша бірлескен рейд жүргізіліп келеді. Соның нәтижесінде біраз мемлекеттік қызметкердің мұндай құқықбұзушылыққа барғандығы анықталды. Атап айтар болсақ, облыстық статистика департаменті басшысының орынбасары М. Букенов, Көксу ауданы құрылыс бөлімінің басшысы Қ. Әдетбеков, Шеңгелді ауылдық округінің әкімі Е. Қойлыбаев. Сенбі, жексенбі күндері мемлекеттік автокөлікті ешбір анықтамасыз өздері тізгіндегендері үшін Әдеп жөніндегі кеңестің талқысына түсті. Қазақстан Республикасы мемлекеттік қызметшілері Әдеп кодексінің 5-тармағының 10-тармақшасын бұзғандары үшін Көксу ауданының құрылыс бөлімінің басшысы Қ. Әдетбеков қызметке толық сәйкес еместігі туралы ескерту алса, облыстық статистика департаменті басшысының орынбасары М. Букеновке, Шеңгелді ауылдық округінің әкімі Е. Қойлыбаевқа ескерту түріндегі тәртіптік жазалар қолдану ұсынылды.
Тәртіптік практиканы талдау қорытындылары негізінде мемлекеттік органдардың тәртіптік комиссияларының жұмыс нәтижелері тыңдалды.
Е. БАУЫРЖАНҚЫЗЫ.